فارس بلا مأوى الجزء الثامن
– أني ماريداش حاچة في الدنيا غيرك، بالله عليك لأچل خاطري، إياك تسوي حاچة تودي روحك في داهية.
أمسك بيدها و ربت عليها بيده الأخري قائلاً:
– ما تقلقيش، أني خابر اللي هسويه زين، كل اللي بطلبه منك تاخدي بالك من حالك، خليكِ مع سمية شكلها بت حلال جوي، لحد ما اخلص شوية إچراءات و هاخدك و نرچعو علي البلد.
رمقته بفرحة لم تعهدها منذ زمن، تغمرها سعادة لقاء حبيبها بعد فراق مستحيل، لعل هذا سوف يبدد مخاوفها التي ما زالت تلزمها من حين لآخر، لا تعلم أن ما تنكره يُخزن داخل عقلها الباطن و يكون كالبركان الذي يحسبه الجميع خامد و هو غرار ذلك.
※ــــــــــــــــــــــــــــــــــ※
تتمدد علي أريكة جلدية داخل غرفة خاصة بمفردها بعدما أوصي أكرم الضابط عليها ريثما يتم ترحيلها إلي النيابة.
كانت في حالة عزلة عن الواقع تبكي تارة و تضحك تارة، تتخيل من حين لأخر أن أكرم عاد إليها فـ تكتشف إنه مجرد حلم يقظة ليس أكثر.
طرق علي الباب يليه صوت الضابط:
– مدام ندي،في زيارة لحضرتك؟
نهضت من علي الأريكة و وقفت قلبها يخفق، تظن إنه أكرم و سوف يتراجع في قرار إيداعها في مشفي لعلاج الأمراض النفسية و ربما سيجعلهم يطلقون سراحها.
– خليه يتفضل.
فُتح الباب و دخل أخر شخص تود رؤيته في تلك اللحظة، شهقت بخوف و تراجعت عدة خطوات إلي الوراء.
– إيه خايفة لأكون جاي أخلص منك زي ما حاولتي تخلصي من مراتي و إبني اللي لسه ملحقش يشوف النور يتقتل بسببك!
وضعت كفها علي فمها و أجهشت في البكاء، تهز رأسها برفض:
– ما أقتلتهاش، ما أقتلتهاش.
رمقها بإزدراء و قال بتهكم:
– أنتِ فعلاً ما قتلتهاش و لا ضحكتي علي حد و أستغليتيه أسوأ إستغلال و لا خنتي، ده أنتِ إبليس يتعلم منك.
ظلت تقرر ما تقوله سابقاً فضرب بقبضته علي الحائط و صاح بها:
– أسكتِ مش عايز أسمع صوتك، فاكرة حبة الجنان اللي عماله تعمليهم دول هيدخلوا عليا و أصدقك!
إبتسم بتهكم و قال:
-ده كان زمان يا مدام ندي، علي الحسيني بتاع زمان مات و أندفن و أندفنت كل ذكرياته معاه، اللي واقف قدامك ده واحد تاني، واحد لقي واحدة غيرت له حياته ٣٦٠ درجة للأحسن، و مش هاسمح لك تيجي بعد كل ده تدمري لي حياتي زي زمان!
أنا مش هارحمك، و لو مروة سامحت في حقها أنا مش هاسامح و لا هتنازل عن القضية، خليكِ دوقي طعم الوحدة و الخسارة، إنسانة طماعة و مغرورة و كدابة و خاينة زيك لازم تاخد جزائها و تخسر كل حاجة.
