فارس بلا مأوى الجزء الرابع
رد بصوت منخفض وبسعادة عارمة:
_ أني فارس يا عم چابر.
_ فارس، فينك إكده يا ولدي أي الي حوصل وياك؟.
_ أني بخير الحمدلله وعايش بعيد عن النچع، وكيف ماسمعت في الأخبار طلع علينا في عربية الترحيلات عصابة هربت كبيرها وهربنا إحنا كمان وربنا رزجني بصاحب چدع ما عيفرجنيش واصل.
_ طمنت جلبي يا ولدي الله يفك كربك ويظهر براءتك قادر يا كريم.
سأله بقلق:
_ لسه مفيش أخبار چديدة خابرك بيها المحامي؟.
أجاب جابر بقلة حيلة وإحراج:
_ لسه والله يا ولدي، خاصة موضوع هروبك دي صعب الموضوع أكتر، خايف لأجولك تسلم حالك تلاجي الحكومه حاطه عليك وهيبهدولك أكتر وفي نفس الوجت بجول خليك مكانك لو أنت عايش زين لحد ما توصل لبراءتك أنت من ناحية وإحنا والمحامي من ناحية تانية.
تجهمت ملامحه و رد بسأم:
_ إن شاء الله يا عمي، أدعولي وخلي الخالة هنادي تدعيلي كتير، أومال فينها إكده أتوحشتني جوي.
أجاب بتوتر فهو يخشي أن يسألها عن زينب وهي رغماً عنها ستخبره حتي لا يعلق قلبه وحياته عليها، يكفيه آلام وأوجاعاً وظلم لن يتحمله بشر.
_ معلش يا ولدي، أصلها كانت صاحية من الفچر ونامت من بعد صلاة العشا وأنت خابر صعب أصحيها.
أطبق شفتيه ثم قام بتفريقهما ليقول:
_ سلملي عليها كتير لما تصحي وأني هبجي أتصل بيكو مرة تانية بإذن الله.
_ حاضر، أنت محتاچ أي حاچة أبعتهالك؟.
_ لاء، ياعمي مستورة والحمدلله أني عشتغل ومعاي الي يكفيني وزيادة.
_ ماتنكسفش يا ولدي كله من خيركم، مهما عطيتك كله من خير ابوك الله يرحمه.
_ الله يرحمه، متشكر ياعمي خليك لوجت الحوچة.
_ ربنا ما يحوچك أبداً لحد واصل يا ولدي.
_ تسلم ياعمي، مع السلامة.
أنتهي من المكالمة وقام بمحاسبة البائع، وسار نحو طريق المنزل، فأوقفه رؤية شريف زميلهم الثالث بالمسكن، يجلس بداخل سياره جوار إمرأه أربعينية يمسك بيدها ويقبل كفها وأتبعها بقبلة خاطفة علي وجنتها مع إبتسامة لم تفارق ثغره، وكاد ينزل فأوقفته السيدة وأعطته ظرف قام بفتحه واخرج منه بعض ورقات من المال ثم ألقاهم بداخل الظرف و وضعه في جيب سترته الداخلي.
كانت مئات الأفكار تدور بداخل عقل فارس فهل ما أدركه الآن هو صحيح!.
ألقي السؤال علي حاله ويخشي الإجابة المتوقعة:
_ ياتري حكايتك أي أنت كمان يا شريف؟.
