فارس بلا مأوى الجزء الرابع
بادلتها التحية بإبتسامة زائفة من بين أسنانها:
_ صباح النور يا خالة.
عادت إلي الداخل تزفر بقلة حيلة وبحنق قالت:
_ عاچبك إكده الوليه أم أنور چارتنا جاعدة أدام دارها عتنجي الرز والله أعلم هتدخل چوه ميتي.
حك ذقنه يفكر قليلاً فقال:
_ خلاص أطلعي أنتي لعمتي وحاولي ألهيها بأي حديت وياريت لو خدتيها في أي مطرح غير بره عجبال ما أخرچ من الباب.
أتسعت حدقتيها وبتهكم قالت:
_ عتهزر صوح!، وأفرض شافك بكر ولا أبوي وأنت خارچ من أوضتي.
إبتسم بخبث وأقترب منها واضعاً يده علي كتفها قائلاً:
_ وجتها هجول للشيخ واصف أن مستعد أصلح غلطتي وأكتب عليكي وأتچوزك.
_ ده لما تشوف حلمة ودنك.
رد بإستفزاز ومازال مبتسماً:
_ ما أني عشوفها علي طول.
غرت فاهها:
_ كيف دي؟.
راقص حاجبيه ليثير من حنقها أكثر:
_ عشوفها في المرايه يا بطتي.
جزت علي أسنانها تمنع نفسها من الصراخ، لكمته في صدره:
_قسماً بالله أني ما شوفتش في برودك واصل.
_ يا فاطمة.
تناديها جليلة فأجابت الأخري بصياح:
_ حاضر ياماه أني صحيت أهو وچايه دلوق.
ألتفتت له وقالت:
_ خليك أهنه وماتتحركش، عجبال ما أشوف حل في المصيبة دي وربنا يستر.
_ ماتخافيش هستناكي.
قالها لتذهب وسحب وشاحها بدون أن تدري و وضعه أسفل أنفه وأخذ يستنشق عبق رائحتها التي آسرت كل حواسه بإستمتاع عارم.
ــــــــــــــــــــــــــــــــــ،،،،،ــــــــــــــــــــــــــ
_ تمكث بداخل مكتب الضابط منذ البارحة لاتعلم لما هي هنا وما هي التهمة الموجهة إليها، كلما سألت أحداً يصيح بها ويأمرها بالصمت المُطبق.
غلبها النوم رغماً عنها حتي أستيقظت بفزع علي صوت الضابط الذي دلف للتو.
_ وكمان نايمة، أومي فزي يا روح خالتك أنتي مش في بيتكو.
أنتفضت بذعر و وقفت تتثائب:
_ وليه الغلط بس يا بيه، مش كفاية جابضين عليا من عشية إمبارح ولغاية دلوق مفيش حد عايز يجولي أني سويت أي!.
حدجها الضابط بحده وقال:
_ ده أنتي مطلوبة بالإسم ومن مديرية الأمن يبقي مليون في الميه عاملة مصيبة.
أزدردت لعابها وقالت بدفاع وتمنع عينيها من البكاء:
_ والله يابيه أني ماجصدتش أفتح له دماغه هو الي دكتور شمال كان عايز لامؤاخذة يتحرش بيا وأني دافعت عن حالي و…
قاطعها رنين جرس الهاتف الداخلي للمكتب، فأشار إليها:
_ أخرسي مش عايز أسمع صوتك.
