فارس بلا مأوى الجزء الرابع
أنتابته نوبة ضحك ويضرب كفوفه في بعضها البعض:
_ يخربيت الأفلام الأبيض وأسود الي واكلة دماغك، الكلام ده لو الي معاكي عيل مراهق أو شاب لسه في العشرينات كل تفكيره في الحاجات دي، ياسمية يا حبيبتي أنا واحد دخل الأربعين وفي مجال قابل فيه كل حاجة، فمش معقولة هعمل الي بتقولي عليه ده،وكلها ساعات وهقابل والدك أطلبك منه للجواز!.
كانت تستمع إليه وقالت بداخل عقلها:
_ ما هو أنت لو ماسوتش إكده، أني الي ممكن هتهور عليك، وأنت حليوة وعيونك الزرجه الي عتلمع ولا ريحة برفانك الي مدوخاني، ده أني الي شكلي هاروح أچيب الشيطان من جفاه.
وجدته يحدق في وجهها بصمت يبدو إنه يقرأ أفكارها من خلال نظرات عينيها له، أزدرد ريقها بتوتر، أرتسمت الجدية وقالت بتصنع :
_ برضك الأصول أصول، أني أتربيت علي إكده.
غمز بإحدي عينيه وقال:
_ ماشي، خلينا ورا الأصول لما نشوف أخرتها.
هبت ريح باردة فأصابها الشعور بالبرد، عقدت ساعديها وأخذت تفرك بيديها لتستمد قليل من الدفء، خلع سترته و وضعها عليها:
_ الجو شكله هيقلب برد، تعالي بقي نقعد جوه ولا لسه مش واثقة فيا؟.
وجدت لديه حق، فهي ترتدي ثوباً ذو بطانة خفيفة قد أشتراه لها في طريقهما لترتديه بدلاً من عباءتها القطنية، تنهدت وقالت:
_ عن شرط، نخلي الأبواب مفتوحة.
فقال بنفاذ صبر:
_ يبقي خلينا هنا في الطل أحسن.
أذعنت أخيراً له و وافقت علي المكوث بداخل السيارة، عم الصمت بينهما وظلت تنظر بشرود إلي الخارج عبر زجاج النافذة، فأنتابه الشعور بالنعاس من هذا الملل، ضغط علي زر فتمدد المقعد إلي الخلف كالمضجع، أغلق عينيه وبعد قليل أنتبهت إليه لتجده يغط في النوم، أنحنت نحوه تتأمل ملامحه وبدون أن تشعر تفوهت بصوت مسموع ظنت إنها تردده في نفسها:
_ خابر يا صلاح، من أول يوم شوفتك فيه برغم كان يوم أسود ومهبب علي الي حصل معاي من صاحبك هولاكو، لكن أنت الحاچة الوحيدة الي هونت عليا أي وچع أستچدعتك جوي لما أنقذتني وخدتني حداك، عارفه أني كنت كيف الدبش وجتها بس غصب عني خوفت لتطلع كيف المدعوج سليم، والحمدلله طلعت أحسن بكتير، وهتبجي أحسن وزين وهاحبك أكتر لو هملت شغلك المشبوه وياه وأتجيت ربنا وتوبت من الي أنت فيه.
فتح عينيه فتلاقت زرقاويتيه بعينيها الكحيلة ذات الأهداب الكثيفة قائلاً بهدوء:
_ أفهم من كلامك أنك فعلاً بتحبيني؟.
