فارس بلا مأوى الجزء الثالث
تبدلت ملامحه من الضحك إلي الضيق، فنهض وبحث عن متعلقاته:
_ طيب يا مدام سمر، أحب أشكرك علي جدعنتك معايا، معلش أستأذنك بقي يا دوب أروح وأغير وهطلع علي الشغل.
_ أي ده يقطعني، شكلي عكيت في الكلام ولا أي، حقك عليا، أقعد بس كولك لقمة ده أنا عملالك أكل هتاكل صوابعك وراه، أمي طول عمرها تقولي بت ياسمر ده الي هيتجوزك هيموت فيكي بسبب أكلك بس.
أومأ لها بإحراج يحك ذقنه:
_ معلش خليها مرة تانية، وأنا الي هعزمك.
رأت إصراره علي الذهاب فقالت:
_ علي راحتك يا سي علي، البيت بيتك وأهلاً بيك في أي وقت، وأبقي أسأل عليا.
_ حاضر.
_ طيب خليك عندك ثواني وجاية.
دلفت إلي غرفتها، وهو أخذ أشياءه من فوق الطاولة وهم بالذهاب.
_ أتفضل.
جاءت إليه تحمل بطاقة ورقية:
_ ده الكارت بتاعي علي كل أرقام تليفوناتي.
أخذه منها و وضعه في جيب سترته:
_ خدي بالك من نفسك، سلام.
ذهب، سارت خلفه لتغلق الباب خلفه، تنهدت وأسندت ظهرها عليه:
_ الله يسلمك يا سي علي.
ــــــــــــــــــــــــ،،،،،،، ــــــــــــــــــــــــــــــــ
_ وقفت الخالة هنادي أمام منزل خميس القناوي، طرقت الباب، فتحت لها زينب فكانت في إنتظارها حيث هاتفتها وطلبت منها المجيئ لإخبارها بأمر هام.
_ يا أهلاً ومرحب بيكي يا خالة.
قالتها زينب وعانقتها بترحاب وحبور
_ حمدالله علي سلامتك يا غالية، كنت هاتچنن عليكي لما سمعت بالي چري وياكي.
أمسكت زينب بيدها وهي تنظر في أرجاء المنزل فقالت:
_ تعالي چوه في أوضتي نجعدو ونتحدتو علي راحتنا.
وبعد أن دلفت الخالة إلي غرفتها قامت الأخري بمضايفتها ثم جلست معها وبدأت تتحدث:
_ معلش يا خالة عارفة أني مجصره وياكي أنتي وعمي چابر، ربنا عالم الي كنت فيه الأيام الي فاتت.
ربتت عليها الخالة:
_ عارفة يا بتي وعذراكي، دي أني كان جلبي واكلني عليكي لما عرفت الي حوصل معاكي وآخرها إنه أنكتب كتابك علي الراچل إياه غصب عنك ، الله يسامحه أخوكي ويهديه.
تنهدت زينب وقالت:
_ يارب، ماكنش بيدي يا خالة، هربت منيهم لآخر الدنيا ووصلو ليا وهددوني يا أرچع وياهم ويعجد عليا يا إما يأذو الناس الي كنت حداهم ويجتل فارس.
شهقت هنادي وضربت علي صدرها:
_ الله يحرجهم ما كفهمش رميتو في السچن وبهدلته!، عايزين منيه أي تاني، ربنا علي الظالم والمفتري.
