فارس بلا مأوى الجزء الثالث
ــــــــــــــــــــــــ،،،،،،، ـــــــــــــــــــــــــــــــــ
_ يتمدد علي الأريكة منذ البارحة، فبعد أن طلبت منه إنتظارها بعد إنهاء فقرتها، عادت لتجده ثمل كثيراً ولم يعِي إلي أي شئ من حوله، شعرت نحوه بالشفقة فأخذته معها إلي منزلها وأسنده حارسها ودلف به إلي الداخل فوضعه أعلي الأريكة ورحل.
سطع ضوء شمس الظهيرة فتسلل الشرفة وتسلط علي عينيه، فتحهما ببطئ ونهض جالساً يضغط علي أعلي أنفه بإبهامه وسبابته، يداهمه ألم الرأس بسبب ما أحتساه البارحة من الخمر.
جال بعينيه متعجباً من المكان حوله، فوجدها قادمة إليها تحمل صينية كبيرة عليها أطباق من الطعام الذي أعدته للتو.
_ صباح النور يا لول، ناموسيتك كحولي.
رفع عينيه ليجد تلك الجميلة، ترتدي عباءة قطنية تصف منحنياتها بدقة تصل إلي ركبتيها وتكشف عن زراعيها، وقفت أمامه لتضع الصينية علي الطاولة أمامه، حك فروة رأسه يحاول أن يستعيد ذاكرته فقال:
_ أنا فين؟ وأنتي مين؟.
أطلقت ضحكتها التي لاتفارقها وقالت:
_ ليك حق متفتكرش يا قمر، أصلك كنت سكران طينه ليلة إمبارح وصعبت عليا فجبتك هنا عندي، أنا ياسيدي أبقي سمر وشهرتي في الكباريه والمجال سماره، وأنت في شقتي المتواضعة الي مدخلهاش راجل غيرك أنت والبودي جارد بتاعي وسي زيكو جوزي.
عقد مابين حاجبيه:
_ جوزك!.
أبتسمت حتي ظهرت أسنانها ناصعة البياض:
_ أيوه جوزي، بس عرفي أصله ملهوش في الرسمي، وأنا مليش في الحرام فشرطت عليه نكتب حتي ورقتين عرفي، أومال أي يا أخويا، الشمال أخرته وحشه وأنا ست دوغري وليا سمعتي، والواحده فينا ليها أي غير سمعتها وشرفها.
ضحك علي من كلماتها وأسلوبها العفوي، فأردفت:
_ آراك بتضحك علي كلامي ياسي لول، هو أنا كنت بقولك نكت ولا أي؟.
_ لاء لاسمح الله، أنا بس عجبني مبدأك وطريقة تفكيرك، واضح إنك طيبة خالص وغلبانة.
شهقت وهي تتشدق:
_ ها، أي غلبانة دي، شايفني قاعده علي باب الجامع بشحت وبقول لله يا محسنين.
قهقه وقال بإستنكار:
_ لاء والله ما قصدي، أنا كل الي أقصده إنك جدعة وبنت بلد، مهونتش عليكي تسبيني سكران وجبتيني علي بيتك وبتضايفيني وأنتي متعرفيش عني غير أسمي بس.
_ هو أنا مقولتلكش!، أنا خليت الواد تايسون جابلي تاريخ حياتك كله وبعدين أنا ليا نظرة في الي أدامي متخيبش أبداً، أول ما شوفتك قولت الولاه ده إبن ناس وطيب وشكله مجروح جامد وحكايته كبيره وراها واحدة ست.
