فارس بلا مأوى الجزء الثالث

أنتبه أكرم لتلك الجملة الأخيرة فجز علي فكه بقوة وعروق عنقه برزت بشدة، أكمل إنصاته إلي طارق:
_ المهم لما ماتت أكتشف من المحامي بتاعها إنها كتبت له كل ممتلكاتها بإسمه، قعد فترة هناك عقبال ماصفي الشركة وفروعها كلها ورجع مصر، وزي ماعرفت كده داخل شريك بنسبة أسهم 70٪ في القرية الي نزلته فيها، ده غير الشركة الي ماسك إدارتها حالياً أشتري أسهمها بالكامل، بتهيألي الشركة دي الي بتشتغل فيها مدام ندي.

تفوه أكرم من بين أسنانه بإستنكار:
_ كانت بتشتغل فيها.

رمقه طارق بإستفهام:
_ أوعي تكون أنت الي خلتها تسيب الشغل، أصل أنا عرفك لما بتطلع حاجه في دماغك لازم تنفذها.

_ هي الي سابت الشغل من نفسها، قالتلي عايزه تتفرغ لتربية البنت.

_ والله وحشاني الكتكوته الشقيه، ماتجبيهم وتعالو قضو معانا يوم، المدام كل شويه تسألني عليكو حتي الأولاد، مازن إبني بيقولي يا بابي قول لأونكل أكرم يدينا لارا تعيش معانا.

إبتسم أكرم وقال:
_ قولو متغلاش عليك يا حبيب عمو، ده أنا أجبهالك لحد عندك بشنطة هدومها.

_ ربنا يخليهالكو وتفرحو بيها، شوفت كنت هتنسيني جايلك في أي، لسه عارف لك أخبار طازه، سليم العقبي.

أنتبه أكرم بكل حواسه، فمشاكله العائلية جعلته يغفل أمر هذا المجرم الذي يترصد له كل تحركاته حتي يوقعه ويزج به في السجن.

_ البيه كتب كتابه علي بنت من نجع في محافظة قنا، وبعد فرحه هياخدها ويسافرو علي أمريكا، تحديداً في ولاية لاس فيجاس.

عقب أكرم قائلاً:
_ وإشمعنا لاس فيجاس، مش هيروح كاليفورنيا زي كل مرة ليه؟.

أجاب طارق بتفكير:
_ ما هو ده المغزي، كل أعماله وبلاويه في كاليفورنيا، ومعني إنه هيغير خط سيره المرة دي في ولاية جديدة يبقي ليه مصلحة فيها، خاصة لاس فيجاس مشهورة بالكازينوهات وعصابات المافيا والسلاح والقمار والدعارة، ومليون في الميه عنده صفقة من إياهم.

أطلق زفرة عميقة وقال:
_ والله يا طارق أنا دماغي واقفه حالياً، والي بتتكلم فيه ده موال كبير والأنتربول علي يدك آخر مرة شال إيده ومرضوش يساعدونا إننا نمسكه متلبس، وطلع إن فيه حد فيهم شغال لحساب الطرف التاني شريك سليم وبيبلغهم بكل تحركاتنا.

حدجه طارق بدهشة متعجباً:
_ غريبة، ده أنا قولت هتتحمس أكتر لما أقولك وهنفكر مع بعض هنعمل أي، خاصة ياسر مدكور واخد أجازة مرضي، كان في مهمة بيقبض علي شوية عيال ديلرز فواحد منهم كان ليه تار عنده أداله بالحديده علي قصبة رجله عمله كسر مضاعف.