في سبيل صهيب الجزء الرابع

سبيل غمضت عيونها، شردت فـ كلامه، والخوف رجع يزحف جوّاها، كأنها بتشوف بعينيها، صهيب وهو بيشوف سها فـ حضن غيره، الغضب اللي ممكن يسيطر عليه، الوجع اللي هيحسه، الدم اللي ممكن يسيح لو اتهوّر: قولتله يا جدو، بس برضو خايفة عليه، من وجع الصدمة، لما يشوف الفيديوهات والصور اللي بعتهاله، خايفة ما يتحملش ويتهوّر ويقـtـلها، او ينهار ويجراله حاجة، خايفة هاني ونرمين يأذوه ويحرموني من نفسه اللى موجود حواليا، خايفة ابني يتيتم يا جدو، لو جراله حاجة انا مش عارفة هعيش ازاى من غيره.

عمران بص لها بحنية، وحسّ بكل كلمة طالعة من قلبها، قرب منها أكتر، وحطّ إيده ع إيدها، نبرة صوته مليانة حب حقيقي: يااااااه، كل ده جواكي، قد كدا بتحبيه يا سبيل؟

سبيل رمشت ببطء، دمعة وقعت ع خدها، حركت راسها حركة بسيطة، صوتها كان أضعف من إنها تعترف، لكن الكلام خرج غصب عنها: بحبه، دي كلمة قليّلة اوي ع اللى فـ قلبي يا جدو.

عمران أخد نفس قوي، بعدين ابتسم: خلاص أحنا فيها، يلا نرجع مصر، وقوليله الكلام الحلو ده.

سبيل غمضت عيونها وهزّت راسها بوجع: لأ، مش قادرة ارجع، موجوعة منه أوي ومش قادرة اسامحه.

عمران خرجها من حضنه ومسك إيديها الاتنين، بصّ لها نظرة طويلة، كأنه بيحاول يفهم اللى بتقوله، وبعد لحظة بهدوء: انتي بتنتقدي نفسك يا سبيل؟ ازاى بتحبيه وخايفة عليه ومش عايزة ابنك يتيتم؟ وازاى رافضة ترجعي؟ ما هو انتي كدا برضو هتيتمي ابنك وابوه موجود، خصوصا انه لحد اللحظة دي ما يعرفش ان له ولد منك.

سبيل رفعت راسها للسما، دموعها خانتها، صوتها طلع مهزوز وهي بتهمس: صدقني يا جدو نفسي اسامحه، نفسي ارجع واقوله اني بحبه، نفسي يكون جنبي وانا بولد ويكون اول ايد تشيل ابننا، بس كل ما افتكر رفضه ليا وافتكر اللى عمله فيا، قلبي يوجعني وما اقدرش اسامحه.

عمران بص لها بمكر، وبنبرة مليانة تحدي: طب والخطر اللى حواليه؟! مش لسة كنتي بتقولي انك خايفة عليه، ايه؟ هتسيبيه كدا لوحده؟!

سبيل بصّت له بحدة، ورفعت حاجبها، وابتسمت ابتسامة خفيفة، لأنها استوعبت تلميحاته، ومن غير كلمة زيادة، مسكت موبايلها، كتبت رسالة بسرعة، قلبها دق جامد وهي بتبعتها، وبعدها اتصلت برقم فتحي، وبمجرد ما رد، نبرتها كانت قوية وحازمة: اسمعني يا فتحي عايزاك تزود حراسة ع صهيب فـ كل مكان موجود فيه، عايزة ناس عندها قدرة انها تتخفى كويس وماحدش يحس بيهم وفـ نفس الوقت يكونوا حيط صد لأى خطر ممكن يتعرض له، وكمان تزود حراسة ع القصر واللى فيه، مش عايزة ناموسة تأذي حد من عيلتي، فاهم يا فتحي؟ لو حد جراله حاجة فيها عمرك، انت فاهم؟