في سبيل صهيب الجزء الرابع
نادر: يعني انت يا جدي ما كنتش تعرف حقيقتها؟
عمران: هعرف منين يا ابني؟ واحدة جات طلبت شغل فـ وقت من الاوقات وشغلتها، شهر والتاني لاقيت ابوك قال عايز يتجوزها.
قبل ما يكمل كلامه نادر قاطعه: مارفضتش ليه يا جدي وقولتله انها مش من مستواكم؟ انتوا اصحاب شركات وهى مجرد موظفة؟
عمران بهدوء: مافيش فرق بين غني وفقير يا حبيبى، كلنا امام الله سواسية، وطالما بالحلال ليه ارفض، وقتها قولت لـ ابوك اسأل عليها كويس عشان تعرف ام عيالك طبعها ايه، قالي ما تخافش يا بابا انا سألت وعرفت، هى أرملة خسرت جوزها وبنتها الوحيدة، وانا أرمل ومحتاج زوجة وأم لـ بنتي، وافقت وقلبي مش مرتاح، وبعد السنين دي كلها ظهر المستخبي وبان.
نادر اتنهد وبص لـ عمران بندم: كان عندك حق يا جدي فـ وجهة نظرك فيها، أنا آسف، حقك عليا، سامحني لو كنت غلطت فيك بسببها وقول لـ سبيل تسامحني، ارجوك.
عمران بتنهيدة حب: اللى بيحب بيسامح يا نادر، واحنا مش بس بنحبك انت حتة مننا، حفيدي الغالي ونور عيني، وأخوها الوحيد وسندها بعدنا واللى هتقف فـ ضهرها لو جوزها جه عليها، وأكيد للسبب ده عمرنا ما زعلنا منك، المهم دلوقتي انك فهمت وعرفت الحقيقة، عايزك تكون كتف بكتف مع شهاب وصهيب وتكونوا فـ ضهر سبيل ويمنى وشاهندة وتحموهم كويس من غدر الناس يا ابني.
نادر وطى ع ايد عمران وباسها وبنبرة كلها ندم: اوعدك يا جدي، هكون زى ما انت عايز مع اخواتي، وعمري ما هخذلك ولا أخذلهم ابدا.
اتنهد عمران براحة ومسح ع شعر نادر قبل ما يخرج وبنبرة كلها حب: كدا أموت وانا مطمن ان زرعتي اللى زرعتها ورويتها بالحب طرحت خير يتمد لأخر العمر.
علي قرب من عمران باس ايده وقلبه بيدق بقوة وبنبرة مليانة خوف: بعد الشر عنك يا بابا ربنا ما يحرمناش من وجودك فـ حياتنا، عايزك تسامحني ع كل اللى عملته، انا السبب فـ وجع العيلة كلها، ياريتني كنت سمعت كلامك زمان، ما كانش كل ده حصل.
عمران ابتسم ابتسامة هادية وهز راسه وبنبرة دافية: كله مقدر ومكتوب يا علي، كل خطوة بنخطيها مكتوبة فـ اللوح المحفوظ من قبل خلق آدم عليه السلام، ارتاح وريح بالك، اللى يهمني دلوقتى انك فوقت ورجعت زى زمان، حابي ع عيالك وحببهم فـ بعض يا ابني قبل ما صاحب الحق ياخد حقه.
خرج بعدها من الأوضة، سابهم ياخدوا راحتهم ويتصافوا، يمكن يقدروا يخرجوا من العزلة اللي هما فيها ويرجعوا تاني يتلموا مع العيلة.
