في سبيل صهيب الجزء الرابع
عمران طبطب ع كتفها بحنية، وبنبرة جادة: سيبك من الهزار بقى، وتعالي نتكلم جد شوية، عرفتي ازاي انه واجهها؟!
سبيل فتحت الموبايل، ورّته رسالة لسه جاية من لحظات، ومدّت الموبايل ناحيته من غير ولا كلمة.
عمران اخد الموبايل منها، عينه جريت الكلام وشاف اسم المرسل، دادة محاسن، قرأ الرسالة وهو قلقان: الحقي يا سبيل يا بنتى، صهيب هيموت سها ويضيع نفسه، كل اللى فـ القصر ماحدش قادر عليه، اتصرفي بسرعة…
رفع لها عينه وابتسم رغم خوفه الواضح ع ملامحه: امممم، بقى محاسن هى العفريت بتاعك!! والله اصيلة وفيها الخير.
سبيل مسحت دموعها وهى بتبتسم ابتسامة حزينة: من يوم ما مشيت اول مرة من كام سنة وهي بتطمني عليكم كلكم، ومرة كان حصل لـ صهيب مشكلة وكان متعصب جامد، وقتها قالتلي، بقيت هتجنن ومش عارفة اعمل ايه، لحد ما جه فـ بالي ابعت له رسالة من رقمي البرايفت، مش فاكرة كتبت له ايه وقتها، بس بعدها لاقيت دادة بتكلمني وتقول انه هدي فجأة، كأن مافيش حاجة حصلت، ومن ساعتها هى تبلغني اللى بيحصل معاه وانا ابعت له رسالة تهديه.
عمران مسح على دقنه وهو بيهز راسه بتفكير: طب تفتكري ان رسالتك النهاردة هتهدّيه؟
سبيل بتنهيدة قلق: كلها شوية وتيجي رسالة من دادة محاسن ونعرف اللى حصل.
عمران حط الموبايل ع الترابيزة، وبص لها نظرة كلها اهتمام: طيب ده بالنسبة للقصر، وبرة القصر بقى، عفريتك التانى اللى اسمه فتحي، ايه حكايته؟
سبيل ضحكت بخفة، وهي بتتكلم بحماس: شوف يا سي جدو، فتحي ده ظابط مباحث سابق، تقاعد بسبب إصابة فـ رجله واشتغل فـ شركة حراسات خاصة صاحبها لوا سابق فـ الجيش، اتعرفت عليه فـ باريس هو ومراته، وطلبت منه يرشحلي حد كويس وثقة يكون زي ضلكم برة القصر، وسيادة اللوا وقتها رشح فتحي.
عمران بص لها بدهشة: وطلع ثقة؟!
هزت راسها بحماس: أكتر مما تتخيل! وبسببه يا باشا، حاليا بقى عندي فريق مخابرات خاص متدرب ع أعلى مستوى ماشي وراكم بيحميكم من أى خطر، واى حاجة بتحصل بعرفها فورا.
سكتت لحظة وبصت له باستغراب وكملت: بس الغريب بقى، انهم ما جابوش سيرة جواز صهيب من سها خالص، مش عارفة ليه!!
عمران ضحك ضحكة إعجاب وبنبرة كلها فخر وسعادة: بقى كل ده يطلع منك؟!
بس ضحكته اختفت بسرعة مرة تانية لما شاف دموعها وهي بتنزل بغزارة، فجأة، رمت نفسها فـ حضنه، حضنته بكل قوتها، صوتها طالع حزين وضعيف: انا ليا مين غيركم يا جدو أخاف عليه، لو حد فيكم جراله حاجة اموت وراه، رغم وجعي منكم، بس مش قادرة اتخيل حياتي وانتوا مش فيها، حتى لو كنت بعيد عنكم، بس يكفيني انكم بخير.
