عند مفترق الطرق الجزء الثاني

تنهد بضيق يبحث عن بديل يستطيع أن يريح الأطراف جميعًا ولا يوضعه في موقف محرج معها بطلب غريب كهذا.. وعى من حالته المتكدرة على اصرار رنين هاتفه .. لينتبه على مكالمة فيديو واردة له من حبيبته على أحد مواقع التواصل الأجتماعي.. فأجاب عنها مبتسما بصوت خافت خشية وصول صوته لمن بالداخل ولكنه رغم حرصه فضح اشتياقه .. خاصة وهي تحتل الشاشة أمامه بصورتها المزينة وشعرها المتحرر..
ـ واحشاااني..

فقالت تطالعه مندهشة..
ـ غريبة..

ـ ليه غريبة!

ـ يعني حساك مش مالك بتاع اليومين اللي فاتوا خالص.. مالك العصبي المتوتر اللي بشعر إنه مش معايا وفرحان برجوعي ليه..
مواصلة بنظرة خاصة .. أكيد في حاجة جديدة حصلت غيرتك بالسرعة دي؟!

فقال متلعثما وهو يواجها أمامه بالصوت والصورة..
ـ أبدا هيكون في ايه.. يمكن كل الحكاية أن أطمنت أنها كلت أخيرا بدل ما يحصل لها حاجة واشيل ذنبها..

ودعت بسمتها على ذكرهِ لتلك المرأة التي باتت عائق بينهما في أوقاتهما الحميمية، فقالت بضجر ..
ـ ماهي لازم تاكل ولا هتسيب نفسها تموت من الجوع يعني ..
مواصلة وعينيها تتفقد المحيط حوله بقدر المستطاع ..
ـ آلا هي فين دلوقت ؟!

ـ في أودتها..

قطعت تفحصها وهي ترمقه بشك مبطن ..
ـ معقول!

ـ ما أنا قايلك من أمبارح أنها حبسة نفسها جو في الأودة ومبشفهاش خالص .. حتى لما خرجت النهاردة كان في غيابي ولما رجعت لقتها في الأودة تاني ..

تنهدت بترقب ..
ـ يعني عاوز تقنعني أنك ماصدفتهاش ولا للحظة لمدة يومين كاملين رغم أنكم في مكان واحد ..

ـ وأنا هكذب عليكي ليه!

ـ يعني.. ممكن عشان مزعلش مثلا ..

تعجب قائلا..
ـ وأنتي تزعلي ليــ..
ثم قطع استفساره بصياح حذر..
ـ سارة أوعي تقوليلي أنك غيرانه من وجودها..

تأففت بضيق وهي تردف بكبرياء..
ـ متتوهمش كتير مين دي اللي أغير منها .. لا هي من مستويا ولا هي من تعليمي .. كل الحكاية أنك قاعد مع واحدة غريبة عنك في شقة لوحدكم ومقفول عليكم باب واحد .. معرفش تعاملكم إيه مع بعض ولأي درجة .. الأيام بنكم هتعدي أزاي أو هي بسكوتها الغريب ده بتخطط لأيه..

ذهل من رد فعلها الجاف ومع هذا ضبط انفعاله بحذر ..
ـ سارة متخليش دماغك توديكي لبعيد أنا صارحتها بكل حاجة وأظن دلوقت كل واحد عارف حدوده كويس .. غير أن البنت فعلا مصدومة وزعلانة بسبب اللي حصل لأنها حاجة مش هينة أنا نفسي ندمان أن كنت سبب فيها .. وحبستها دي حاجة طبيعية لما تتخطى صدمتها وتتقبل الواقع والحدود اللي اصبحت بينا بين يوم وليلة .. يعني مش بتتصنع ولا بتخطط لحاجة زي ما بتهيئلك ..