عند مفترق الطرق الجزء الأول شريهان سماحة

بعد إنهاء المكالمة من الطرفين غمرت نفسها هاربة بين طيات الفراش في سبات عميق منهك ممزوج بالعبرات.. ترجوا من طوافه أن يمتعها بغيبوبة تنسيها أشواك حزنها المفجعة و لو لقليل ..

ــــــــــــــــــــــــــ

أما عنه و هو بين حدود عمله تهافت عليه جميع اصدقائه من الأطباء و الصيادلة و العاملين بالمشفى لأجل المباركة، عاتبين عليه بالمواصلة في العمل في تلك المناسبة الخاصة، و أمام مبرراته قدموا المغتربين منهم اقتراحهم إليه دون اتاحة الفرصة له للمناقشة، عن كون كافة نبشياطه القادمة لمدة ثلاث أسابيع هي بالنهار و فقط و هم سيتحملون عنه فتراته المخصصة للمبيت..
فقال مستنكرا..
ـ ازاي بس يا جماعة.. دا تعب ليكم بجانب نبشيطكم.. و أنا بصراحة رافض كده..

فرد عليه أحدهم غامزا بأحدى عينيه ..
ـ يا عم أنت مالك هو أنت اللي هتتعب و لا أحنا و بعدين ادعيلنا نخلص فترة عذوبيتنا على خير و ترد لينا كل اللي بنعمله معاك..

ليرد الأخر عليهم ضاحكا..
ـ و أنا يا عم المتجوز الوحيد اللي فيهم و بقولك مراتي لسه زيارتها لمصر مخلصتش و قاعد لوحدي في السكن بأزأز لب فمش فارق معايا صبح من ليل أو أن اساعد الشباب يخدموك في اسبوع مهم زي ده..

على أثر جملته الأخيرة انطلق صخب ضحكاتهم معا فاضطر مالك أن يشارك فعلهم بخجل حتى لا يفضح أمره..
و لكنه قطعها بخضه على قول رابعهم..
ـ سبوه يا جماعة هو شكله بيقطع علينا عزومة المحشي اللي مفروض مراته هتعملها للمغتربين الغلابة اللي زينا…

فراح يتخطى صدمته معترضا بشدة.. فقطعه أحدهم صائحا بوجوم و كأنه قرأ نيته ..
ـ لا كله إلا المحشي يا مالك ربنا يسعدك.. دا أنا و رب الكعبة بطني قربت تزرع من أخر عزومة عملتها لينا مرات يحيي قبل زيارتها لأهلها في مصر ..

ليبكمه الأخر بقوله المتتالي ..
ـ عيب يا جماعة أنتم بتقولوا أيه .. دا مالك مثال للكرم و الجدعنة طول السنين اللي عاشرناه فيها و مش هيهون عليه نفضل نقضيها دليفيري و مراته موجودة لو حتى على الأقل عزومة كل شهرين تلاتة ..

فأجابهم مالك بارتباك ..
ـ دا شيء مفروغ منه طبعا يا جماعة و لو عليا زي ما أنتم قلتوا عمري ما اتأخر و هعملهلكم كل اسبوع مش بس شهرين تلاتة.. بس بصراحة دلوقت و في الظروف دي صعب.. مقدرش أفرض على مراتي في الوقت دا حاجة زي كده خاصة و هي عروسة يعني و كده ..
مواصلا بعرض أخر لتحفيزهم و نسيان عرضهم هذا تحديدا ..
– بس عندي استعاد تام اعملها دلوقت حالا في أفخم مطعم أنتم تحددوه ..