المستحيل بقلم شهندة
تململت فمرر يده على شعرها يتخلل خصلاته بحب قائلا: حبيبتي بتفكر في إيه؟
رفعت رأسها تواجه بعينيها الرماديتين مقلتيه العسليتين قائلة بصوت ثابت لايعكس خفقاتها المضطربة: إيه رأيك ياحبيبي نغير الدكتور اللي بنروحله ده ونروح لحد تاني؟ صفية بنت خالتي…
اعتدل مستقيما يقاطعها وهو يخرج من سريره يمسك علبة سجائره ويخرج منها واحدة قائلا بحنق: صفية تاني! احنا مش اتفقنا منتكلمش في الموضوع ده ياهند؟ نهضت تسحب روبها وترتديه ثم تقترب منه قائلة: ياعادل ياحبيبي أنا عايزة أفرحك، عايزاك تشيل ابنك على ايديك وتتباهي بيه في وسط عيلتك زي أصحابك.
كاد أن يشعل سيجارته فتوقف يمسك يديها بين يديه قائلا: وجودي بس جنبك بيسعدني ويفرحني ياهند، ده حلم واتحقق. فاكرة في الكلية لما كان كل شبابها نفسهم يكلموكي وانت كنت بترفضي، خفت أقرب منك مع ان قلبي كان متعلق بيك، خفت تصديني زيهم لغاية في يوم مالقيتك بتقربي مني وتطلبي كشكول المحاضرات بتاعي، ابتسامتك وقتها اديتني أمل فقلت جازف ياواد واطلب منها تقعدوا في الكافتيريا وتشربوا عصير ولما وافقتي حسيت اني اتفتحتلي طاقة القدر واني ممكن يبقى لقصة حبي نهاية سعيدة.
ابتسمت تطالعه بحب قائلة: وده اللي حصل، بسرعة حبينا بعض وبسرعة اتخطبنا وأهو اتجوزنا و عايشين أجمل أيام حياتنا. لكن…
لكن إيه؟
أطرقت برأسها قائلة: مش قادرة أمنع نفسي أفكر انك أكيد نفسك في طفل زيي تمام عشان فرحتنا تكمل.
مد أنامله يرفع ذقنها إليه قائلا: أكيد نفسي بس مش مستعجل، قلتلك كفاية عليا وجودك جنبي لغاية ده مايحصل، انسى بقى كلام أمي ومتحاوليش تتأثري بيه.
طيب عشان خاطري ياعادل نغير الدكتور. لو بجد بتحبني.
ابتسم قائلا: مع انك عارفة اني بحبك بس حاضر ياستي نغيره، أي أوامر تانية يابرنسيسة؟
ابتسمت تهز رأسها في سعادة، قبل أن تعقد حاجبيها قائلة: استنى هنا ومتوهنيش. كنت فين النهاردة وإيه اللي أخرك لبعد نص الليل؟
قرصها في وجنتها قائلا: غيرانة عليا ولا بتشكي فيا.
انت عارف اني واثقة فيك زي نفسي تمام. الحقيقة كنت خايفة وقلقانة، أنت عارف اني مقدرش أنام قبل مااتطمن انك بقيت في البيت.
رفع يدها يقبلها بحنان قائلا: هو أنا بحبك من شوية.
نظرتها أخبرته ألا يراوغ ويخبرها على الفور بما لديه، ليتنهد قائلا وهو يسحبها لتجلس جواره على السرير: الحقيقة كنت قاعد في القهوة مع صديق.
صاحب المحل اللي بتشتغل فيه؟
هز رأسه قبل أن يقول: بنته تعبانة وهتعمل عملية خطيرة في القلب.
