المستحيل بقلم شهندة
رفع وجهه إليها يقول بابتسامة رغما عنه جاءت باهتة وهو يقول: اللي زي علا مبيتنسيش ياطنط نبيلة. الله يرحمها.
مرضاش ياحبيبي يتجوز أبدا بعدها، رغم اني كلمته كتير لكن كان دايما يقول مفيش زي علا في الدنيا ياعمتي. وبعدين مش عايز أجيب مرات أب لنفين. روحه فيها ياقلبي والشهرين اللي بتقعدهم مع جدتها في الصيف بيكون فيهم زي المجنون، كل يومين يروح اسكندرية بس عشان يقعد معاها شوية ويرجع.
هل خفق قلب هند للتو في عدم تصديق لاخلاص رجل لذكري زوجته علي مدار سبع سنوات كاملة أم اعجابا بهذا الرجل؟ نفضت افكارها بينما تقول نبيلة لخالد: طب أدهم مش راضي يتجوز عشان ذكري مراته الله يرحمها، انت بقي متجوزتش لحد دلوقت ليه ياخالد؟
غص خالد بمشروبه بينما تقول صفية باستنكار: ماما!
بس يابنت أنا خالته ومن حقي أسأله وبعدين أنا أم وعارفة ان أمنية أي أم تشوف أحفادها ولو سيبنالكم السايب في السايب هنمـ,ـوت من غير مانشوف أحفاد.
ضحكت منيرة قائلة: يسلم لسانك يانبيلة.
مال أدهم علي أذن خالد يقول بهمس مرح: رد يافالح، خالتك وعمتي اتفقوا عليك وهتدخل عش الزوجية ياحبيبي.
مستحيل. قالها بدوره بهمس قبل أن يقول لنبيلة: بصراحة ياخالتي، اللي اتجوزوا سدوا نفسي عن الجواز وحسيت انه شراكة فاشلة فخليني في الشراكة الناجحة. صحيح ياأدهم الشركة عاملة ايه في غيابي؟
ابتسم الجميع بينما أدركت نبيلة انه يتهرب لذا تركت الأمر مؤقتا، اعتدل أدهم قائلا بجدية تعجبت لها هند التي تراه يتمتع بوجوه عديدة وكأن مبدأه لكل مقام مقال: كانت الأمور ماشية زي الفل لحد النهاردة، مصممة أزياء الشركة وهي جاية تمضي العقد طلبت نص مليون جنيه زيادة وطبعا موافقتش فبكل وقاحة قدمت استقالتها وسابت الشركة. عرفت بعدها ان جالها عرض من المنافسين لينا في السوق زي ماكنت شاكك وعشان كدة كانت بتطلب بقلب جامد.
قالت نبيلة بدهشة: هم المصممين بياخدوا كل الفلوس دي؟
قال أدهم: وأكتر لإن مصممة أزياء اي دار أزياء بتبقي هي أساس نجاحهم بأفكارها وابداعها.
قالت منيرة: ولما انت كنت شاكك في انها جالها عرض من المنافسين مديتلهاش الفلوس اللي طلبتها ليه ياأدهم؟
قال خالد: أدهم معاه حق ياماما، مادام عملت كدة يبقي كان سهل قوي يشتروها وساعتها هياخدوا منها التصميمات وينزلوا زيها في السوق بسعر أرخص والمجموعة تخسر.
