في هواها متيم الجزء الخامس
فتحت رهف عين وأغلقت الاخرى ، تنظر إليها كأنها لا تصدق مايحدث بالأونة الأخيرة ، وأن ليان أصبحت حقاً زوجة أخيها ، فهى كانت تعلم بشأن أنها تحب شخص اخر
فرفعت ليان شفتها العليا وهى تقول:
–:” مالك يا أختى بتبصيلى بعين ونص ليه كده”
ضحكت رهف وقالت :
–:” مزبهلة من اللى بيحصل انا فى قمة الازبهلال”
قطبت ليان حاجبيها وهى تقول:
–:” لاء متزبهليش أنتى أساساً كنتى كل الوقت ده بتخمينى وبتضحكى عليا وهو اخوكى وأنا مغفلة ومااخدتش بالى من إسمك وإسمه”
قبلتها رهف على وجنتها وهى تقول:
–:” اصل حبيتك جدا والله وخفت اقولك تاخدى منى موقف وترفضى تصاحبينى بس الصراحة دى اجمد مفاجأة حصلت اجمد من الجمودية نفسها ”
وكزتها ليان بكتفها قائلة بتفكه :
–:” تعرفى تسكتى يارهف بكلامك ده اللى بيودينى فى داهية وبيضحكنى”
تبسمت رهف قائلة :
–:” المهم نورتى البيت أنتى وباسم هو فين صحيح وأنتى سبتينى أنام لوحدى ليه ”
إصطبغ وجه ليان بلون قانى وهى ترد قائلة:
–:” باين عليه قاعد مع مامتك تحت ثم أخوكى هو اللى أصر أروح أقعد معاه فى أوضته”
حاولت رهف تغيير دفة الحديث حتى لا تزيد من شعورها بالخجل ، فقالت متفكهة كعادتها :
–” تعالى ننزل لهم تحت زمان ابيه رفيق ومالك راجعين من الشغل يلا بينا بقى انزل اعمل هجوم وسطو مثلث على التلاجة”
نظرت لها ليان وتساءلت :
–:” هم اخواتك بيشتغلوا فين مش رفيق بيشتغل دكتور فى الجامعة بس”
حركت رهف رأسها برفض وهى تقول:
–:” لاء مبيشتغلش فى الجامعة بس ابيه رفيق هو وصاحبه فاتحين شركة والحمد لله شغالة كويس بيشتروا أراضى وبيبنوا عمارات ومالك هو المهندس المعمارى اللى بيعمل تصميمات المبانى شوفتى اخواتى عسلات إزاى يلا بينا بقى علشان جعت وشنطتى شطبت على كل اللى فيها على ما أروح أملاها من السوبر ماركت
قهقهت ليان على قولها وهى تقول :
–:” انتى مفجوعة كده ليه يا رهف يا ستير يارب”
أغمضت رهف عيناها وقالت بهيام :
–:” الاكل بالنسبة ليا اسلوب حياة فى بينى وبينه عشق لا ينتهى ”
ابتسمت ليان على قولها ، ولكنها تذكرت أيضاً ذلك الرجل الذى يبدو عليه كأنه خلق من فلاذ ، و لايمكن اى شئ يؤثر به ، حتى كلماتها التى تعلم هى انها كلمات واهية تتسلح بها لتدارى ضعفها كحواء تنشد الأمان من آدم
