مش هتمشي قبل ما نتكلم الجزء الثاني
چبت الشاى أها معليشى إتأخرت أصلى سويته على عين البوتاجاز مش فى البتاع بتاع اليومين ده اللى تخط الفيشه فى الحيطه الميه تغلى فى ثوانى والشاى بتاعه بيبجى طعمه ماسخ،مايه مصبوغه.
تبسمت همس قائله:إسمه كاتل،مش بتاع.
تبسمت وصيفه قائله:لا كاتل ولا جاتل ماله البوتاچاز.
وضعت وصيفه الصنيه وقالت:هروح لهمس الصغيره سايباها فى المطبخ لا تلعب فى حاچه.
خرجت وصيفه وتركت كارم الذى مد يدهُ وأخذ كوب من الشاى ومدها ناحية همس يعطيها لها.
نظرت له همس ثم للكوب وأخذته منه،أخذ كارم الكوب الآخر وأرتشف بعض قطرات وقال:
لأ شاى مظبوط تمام…مش زى اللى كنتم بتشربوه لحماد إبن عمتى عطيات.
تنهدت همس ببسمه قائله:حماد كان بيغلث علينا وإحنا كنا بننتقم منه،كمان كان دايماً بيغلس على سلسبيل ويكسر لها التماثيل اللى بتتعب سواء كان فى نحتها أو تشكيلها،وياخد الطين بتاعها يرميه فى أرضية الجنينه ويرش عليه مايه تبوظه، كنا بنحط له فلفل أسود فى الشاى أونجيب نشارة خشب ونلونها أسود،وياسلام لو طلب شاى بلمون كنا بدل السكر بنحط له ملح لمون وكان بيعمل معاها شغل حلو يجزع نفسه،ومع ذالك نفسه كانت دايما مفتوحه للأكل.
تبسم كارم يقول:كنتم بتكرهوه.
ردت همس:وهو حماد فيه شئ يتحب،دى متسلق زى عمتى عطيات وكمان زهرت اللى رغم إنها فازت برباح بس جواها طول عمرها غيره من بنات ناصر العراب.
رد كارم بتفهم:مش غيره..ده حقد فى فرق بينهم…
الغيره إنك تغيرى على شئ بتحبيه وتتمنى يبقى عندك زيه أو جزء منه، إنما الحقد إنك تتمنى الشئ اللى فى إيد غيرك يزول،ويجى ليكى لوحدك حتى لو هتخطفيه من إيدهُ غصب عنه…وده اللى زرعته فى قلبها عمتى عطيات ومش بس فى قلبها كمان فى قلب حماد…بس يمكن حماد أقل من زهرت شويه.
ردت همس بفهم:فعلاً زهرت حقوده ومتأكده زمانها بتغل من سلسبيل،هى كانت بتغل منها أصلاً بس أكيد بعد جوازها من قماح بقت تغِل منها أكتر.
رد كارم:هتصدقينى لو قولت لك مش عارف،أنا بقيت قليل لما بفضل فى البيت،يمكن اوقات كتير يادوب بروح عالنوم بس،بس ماما قالتلى من كذا أسبوع إن زهرت حامل ولازم ابارك لها هى ورباح،بس مجتش فرصه أشوفهم،لأنى البيت فقد طعمه بعد غيابك يا همس حتى بالنسبه ليا فقد الروح اللى كانت فيه،كانت مشاغبتكم إنتم التلاته بتعمل للبيت روح جميله،الروح دى إنتهت بعدك يا همس،حتى هدى وسلسبيل خدوا جنب لوحدهم،إنتهت مشاغبتهم،أنا إتفاجئت بجواز سلسبيل وقماح،يمكن مستغربتش من قماح،قد ما إستغربت من موافقه او بالأصح إمتثال سلسبيل إنها تتجوز قماح…أنا كنت بشوف إزاى هى بتتجنب حتى ترد على كلمه هو قالها.
