مش همشي قبل ما نتكلم الجزء الأول
ردت زُهرت: والسبب أيه… اللى أعرفه چدتى هدايه بتفضل خلف الصبيان عن البنات وده يمكن اللى مصبرها على مرات خالى قدريه.
ردت عطيات: خالك ناصر غاب على ما مراته حِبلت، دول مخلوش ولا دكتور ولا حكيمه اللى وراحوا على بابها لحد ما حِبلت نهله…
إنى فاكره يوم ولادة سلسبيل
الحچه هدايه هى اللى ولدتها وأول ما نزلت البت على يدها جالت:
نبع الميي.
خدها خالك منها وجال… تبقى سلسبيل.
حاوطتها هدايه كأنها كانت كنز…
عكس يوم ما ولدتنى فيكى قالت بنيه وقامت مدياكى ليا وقامت من جنبى.
حتى لو كانت ولدت أى واحده حبله وجابت بنيه كانت تبجى متكدره مش مبسوطه كيف ما ولدت صبى.
إتنين بس اللى شوفتها فرحت بولادتهم
كان قماح، لما ولدت أمه (الاغريقيه) الله يرحمها، ونهله لما ولدتها سلسبيل.
على سيرة الحبل والولاده، ها مفيش حاچه چايه فى السكه.
ردت زُهرت: لاه مفيش…. أنا مش مستعچله أنا يادوب متچوزه من سنه.
نظرت عطيات ل زهرت قائله: وسنه شويه عاد، إستعچلى وإحبلى قبل سلسبيل
سلسبيل لو حبلت هتاخد مكانه كبيره إهنه
ووقتها قدريه نفسها هتركع ليها.
ردت زهرت بأستهزاء: مرات خالى قدريه مبتكهرش فى حياتها قد قماح، ما كلنا عارفين السبب أمه الاغريقيه اللى عشقها خالى زمان وإتچوزها وچابها ضره ليها، دى مرتحلهاش قلب غير لما ماتت بعد ما سجطت.. بحمى النفاس، وسابت قماح إبن عشر سنين، ميغركيش كلمة… ولدى اللى بتجولها قدريه له دى…انا عندى توكيد إنها سبب من أسباب إن مفيش واحده من الاتنين اللى إتچوزهم سابق عمرت معاه،ومتوكده مش هتريح مع سلسبيل ، وبعدين الاتنين مفيش واحده فيهم حبلت حتى مره وسجطت، مش يمكن فيه عيب منيه.
مدت عطيات يدها وأخذت نوع فاكهه آخر قائله : وهى السنيوره سلسبيل ليه لغاية دلوقتى منزلتش من شقتها دى بقالها عشر أيام متجوزه أيه هتنزل أمتى مش خلاص قماح نزل النهارده وراح لشغله…مش عارفه ليه قلبى مش مرتاح لجواز قماح من سلسبيل،والبدايه أهى بقاله عشر أيام منزلش الشغل وكان لازق لها فى شقتهم،وأهو كمان لما نزل للشغل هى برضوا منزلتش.
أخذت زهرت هى الآخرى ثمرة فاكهه وقضمتها بِغل قائله: ده أنا بستغربله قماح الجوازتين اللى فاتوا مكنتش صحيح لسه إتجوزت من رباح بس رباح نفسه مستغرب وبيقولى مكنش بيقعد الفتره دى فى البيت يمكن يومين تلاته بالكتير،لكن مع سلسبيل قعد عشر أيام ومكنش بينزل لا هو ولا هى من شقتهم،حتى هدايه بنفسها أوقات كنت بشوفها طالعه لهم رغم انها بتنهج من طلوع سلمتين،وده غير خالى النبوى وناصر معاه،مش عارفه السبب بس حتى دول مكنوش بيغيبوا عندهم…وسمعت عمتى قدريه بتتكلم مع هدايه إن ليه سلسبيل مش بتنزل،ردت عليها وقالت لها،عريس وعروسه جداد سيبهم يتهنوا ببعض.
