مش همشي قبل ما نتكلم الجزء الأول
تبسم لهن وقال: يلا بسرعه نهله بدأت تصحى، يلا بسرعه على أوضكم غيروا هدومكم وإنزلوا نفطر مع بعض، إمتثلت هدى وهمس وفررن على غرفهن سريعا.
بينما سلسبيل قالت: بابا هو ينفع منزلش عالفطور أنا معنديش جامعه خلاص، وعاوزه أنام.
تبسم ناصر لها وقال: بلاش دلع وبعدين أنا كلمت الأستاذ مجدى المسئول عن الحسابات خلاص وقالى قدامه شويه حسابات وتقفيلات في السنه الماليه هيخلصها وبعدها تجى وانا اللى هدربها وأفهمها في الحسابات بنفسى، فلازم ترجعى نشيطه من تانى.
إقتربت سلسبيل من والداها وقبلت يده قائله: هشرفك قدامه يابابا، ومش بعيد قبل السنه الماليه الجايه أمسك أنا حسابات العراب كلها ونطرد أستاذ مجدى، وآخد أنا مكانه.
تبسمت تلك التي خرجت من باب الغرفه وإقتربت من مكان وقوف سلسبيل وقامت بشد شعرها بقوه قائله: تاخدى مكان مين الأستاذ مجدى مخضرم في الحسابات مش لسه متخرج من كام شهر غير عنده عقل مش زيك يا طويله يا هبله هدومك بتعصر ميه وكمان شعرك، أكيد كنتى مع البلوتين التانين تحت المطر بدل ما تعقليهم لأ عقلك أصغر منهم، يلا روحي أوضتك غيرى هدومك بسرعه قبل ما تاخدى برد وحصلينى على تحت إتعلمى شوية من شغل البيت خلاص كبرتى، زمايلك بجوا عرايس، لازم تتعلمى شويه من شغل البيت ولا مفكره نفسك بعد الچواز چوزك هيچيبلك خدامه إياك.
ردت سلسبيل بآلم مش شد نهله لشعرها: لأ أنا مش بفكر في الجواز دلوقتى ياماما، وحضرتك عارفه إنى بعرف أطبخ كويس وحتى شغل البيت بعرف أعمله، بس أنا هشتغل الأول وموضوع الجواز ده بعدين، أنا مش زى زهرت بنت عمتى ولا هتجوز واحد زى رباح إبن عمى معندوش شخصيه قدام مراته، بكملك كلامك أهو قبل ما تقوليه، أنا هصنع مستقبلى بأيدى وزى ما أنا عاوزه، وأنا في دماغى هدف، إنى أشتغل ومش بس أشتغل هعمل معرض كمان للتماثيل اللى بصنعها.
قالت سلسبيل هذا وغادرت نحو غرفتها.
تنهدت نهله بغضب وقالت ل ناصر: شايف بنتك يا ناصر ودماغها الغبيه.
رد ناصر: بالعكس يا نهله سلسبيل ذكيه جدا، وقوتها بتشبه أمى، ليه شاغله بالك بجوازها، كل شئ نصيب.
ردت نهله: الجواز للبنات ستره يا ناصر ودول تلاته وراء من بعض.
تبسم ناصر: والعلام والإستقلاليه كمان ستره يا نهله أنا اللى هجولك الكلام ده، ناسيه إنى متخرچه من الچامعه وإننا كنا زمايل كمان، صحيح أنا أكبر بتلات سنين، بس خريچين نفس الچامعه، بلاش تبجى آسيه على بناتك دول كانوا لينا جبر بعد طول صبر.
