في سبيل صهيب الجزء الأول بقلم نهلة دراز
علي بنفاذ صبر: نامي يا نرمين وبطلى فضولك اللى هيقـ*ـtـلك ده، الصباح رباح وكل حاجة هتبقى ع عينك يا تاجر.
نرمين: لأ، نام أنت وماتشغلش بالك بيا، انا هخرج بالراحة كدا واعرف ايه اللى بيحصل وارجع بسرعة من غير ما حد ياخد باله
قعد علي فـ سريره وفرد جسمه وهو بيتغطى عشان ينام: براحتك يا نرمين، اعملى اللى يعجبك بس لو بابا شافك زى المرة اللي فاتت انا ماليش دعوة، ماعرفكيش.
نرمين بغيظ منه: بتبيعني يا علي، بقى انا عايزة أطمن ع سبيل وأشوف ان كان صهيب بيضـ*ـربها ولا بيعمل فيها إيه عشان أرجع أطمنك، تقوم تبيعني كدا.
علي برفعة حاجب: بذمتك انتي عايزة تطمني ع بنتي، ولا هتـmـوتي وتعرفي ايه اللى بيحصل بينهم عشان تلاقى حاجة تشمتي بيها فـ سبيل؟
نرمين بدموع التماسيح: ظالمني، والنبي ظالمني يا علي، بقى انا برضو هشمت فـ بنتك!! دى حتى أخت ولادى، معقولة برضو لسانك طاوعك وقولتها، انا كدا زعلت منك وهخاصمك.
علي بنفاذ صبر: بقولك ايه يا نرمين يا حبيبتى، شغل اللوع ده مش عليا، انا فاهمك كويس، عايزة تخرجي تتجسسي زى عوايدك، أخرجي، بس زى ما قولتلك لو حد حس بيكي انا ماليش دعوة، ماشي؟ ما هو انا مش بعد العمر ده كله هترمي فـ الشارع بسببك.
نرمين بغيظ: بقى كدا يا علي!!
علي: آه، هو كدا، وانتي حرة اعملي اللي يريحك
سابته نرمين وخرجت تتسحب زى عادتها لغاية ما وصلت جناح صهيب وسبيل وقربت ودانها من الباب بتحاول تسمع اى حاجة، لكن مش سامعة اى صوت، عدلت راسها وقربت بعينيها تبص من خُرم الباب يمكن تشوف حاجة، برضو مش شايفة حاجة بسبب المفتاح اللى فـ الباب، فضلت واقفة هتجنن مش عارفة صهيب عمل ايه فـ سبيل وفجأة شافت حركة الأوكرة، استخبت بسرعة ورا عمود قريب من باب الجناح وبترمي عينيها شافت صهيب خارج متعصب ومش طبيعي، وقفت تكلم نفسها: يا تري يا ابن سامية عملت ايه فـ اللى ما تتسمى، ياكش تكون خلصت عليها وريحتني منها.
وبعد شوية كمان وهى واقفة بتكلم نفسها شافت سبيل خارجة من الجناح هى كمان منهارة وماشية بالعافية بتجر رجلها وكأنها واخدة علقة mـوت، أستغربت من شكلها وحالتها، لسة هتقرب تدخل الجناح شافت خيال حد بيقرب ناحيتها جريت بسرعة ترجع الجناح بتاعها ومن غير ما تحس خبطت فـ ترابيزة الليڤنج اللى بين الاوض وقّعت الفازة من عليها.
