في سبيل صهيب الجزء الأول بقلم نهلة دراز
سامية هزت راسها بيأس وقبل ماتخرج من عنده: مش بقول لك غبي.
سابته بالفعل وخرجت بعد كدا خبطت ع باب أوضة سبيل اللى قصاد اوضة صهيب ع طول.
______________________
فـ اوضة شاهندة
فـ نفس الوقت شاهندة سهرانة بتكلم هاني خطيبها ع الواتس وهي زعلانة ع صهيب وسبيل، وسألها خطيبها
هاني بسعادة: أخيرا أخوكي رجع، حددي لي بقى ميعاد مع عمي عادل عشان اقابله ونحدد ميعاد فرحنا
شاهندة بحزن: معلش يا هاني هنأجل الكلام فـ الموضوع ده لغاية ما أُمور صهيب وسبيل تستقر.
هاني بغيظ: واحنا هنفضل نأجل فرحنا كدا كتير يعنى ولا ايه؟ وافرضي امورهم ما استقرتش، نفضل احنا متعلقين كدا؟
شاهندة بعصبية: يعنى انت عايزني أعمل فرح وأخويا ومراته حياتهم بايظة يا هاني؟
هاني: يا حبيبتى، إحنا ذنبنا ايه نأجل فرحتنا بسبب مشاكله هو ومراته، وبعدين اعتقد ان سها مابتشغلش بالك اوى يعنى، عشان تخافي ع زعلها!! وصهيب مش هيمانع اننا نعمل الفرح.
شاهندة: حبيبى انا ماجيبتش سيرة سها انا بتكلم عن سبيل بنت عمي، انت ناسي ان هى وصهيب اتجوزوا؟
هاني بتريقة: أه صحيح نسيت ان اخوكي اتجوزها وطفش من ليلة الفرح، تفتكري ليه يا شاهي اخوكي عمل كدا؟
شاهندة بنرفزة: هااااني، من فضلك بلاش اسلوبك الساخر ده، بنت عمي مافيش حاجة تعيبها، بس اخويا بيحب سها زيادة عن اللزوم عشان كدا مشي، ولو سمحت ما تتكلمش تاني فـ الموضوع ده
هاني بهدوء: انتي مالك قفشتي كدا ليه يا حبيبتي؟! انا بتكلم معاكي عادي.
شاهندة: لأ مش عادى يا هاني، وارجوك بقى ما تخلنيش اندم اني حكيتلك حاجة زى كدا، بعد أذنك هقفل المكالمة عشان تعبانة وعايزة انام.
هاني: هتقفلي وانتى زعلانة مني كدا، تؤتؤتؤتي، مش هسمحلك يا حبي.
شاهندة: بليز هاني، انا بجد تعبانة، وعايزة ارتاح تصبح ع خير.
هاني: ايه اللي تاعب حبيبتى كدا ومخليها مش عايزة تسهر معايا الليلة دي.
شاهندة: من اول اليوم واحنا بندور ع سبيل وكنا قلقانين عليها، واخيرا لاقينها من شوية كانت قاعدة فـ الاستراحة، تصبح ع خير بقى، سلام.
وقفلت المكالمة مع خطيبها وهى لسة بتفكر فـ حال سبيل وصهيب وليه الامور وصلت بينهم لكدا؟! ليه اتجوزوا وليه اخوها مشي من ليلة الفرح؟! هل فعلا كلام نرمين طلع صح؟ وصهيب اكتشف ان سبيل بينها وبين شهاب حاجة؟! فضلت شاهندة تفكر لغاية ما غلبها النوم وهى مش قادرة تفهم حاجة من اللى بتحصل حواليها
