خلف الظلال الجزء الآخير بقلم يسرا مسعد
الفصل السابع والعشرون
كانت هاله تجلس بمواجهه التلفاز برفقه صديقتها والتى كانت تتابع احدى المسلسلات الدراميه بشغف حتى افاقت من استغراقها التام بالاحداث على مقطع من الاعلانات التجاريه
فالتفت الى هاله وقالت متحسره : كتنا نيله فى حظنا الهباب …شايفه مهند بيحب نور ازاى ؟
نظرت لها هاله وضحكت وقالت :والله انا مش عارفه جرالك ايه من امتى كونتى بتاعه مسلسلات … وتركى …دا انتى ماكنتيش بتطيقى العربى
قالت امانى بنفس النبره المتحسره :ااه.. العربى خنقه ماعدتش زى زمان ..انما بصى الاتراك وعيشتهم …اوعدنا يارب …تفتكرى البلد دى امتى هتنضف
هاله بحبور: هتنضف يا امانى ان شاء الله
نظرت لها امانى متعجبه : مين ؟ هاله ؟ هاله اللى بتقول كده …لاء انا مش مصدقه ودانى
هاله مستنكره: ليه يعنى ؟
نظرت لها امانى متفحصه وقالت بعد برهه : لاء كده انا مش هيهمنى الاعلانات اللى بتقعد بالتلت ساعه… انا ممكن كمان اقفل التلفزيون ..ايه اللى اتغير يا هاله ..انا بقالى كذا يوم سيباكى ومش بحكى معاكى وقلت اخليكى على راحتك ..انما الطريقه اللى انتى بتتكلمى بيها دى مختلفه
تنهدت هاله وقالت لها : عادى …الكام يوم اللى فاتو اتغيرت جويا حاجات كتير اووى…. بس ما اعرفش صاحيه الصبح وحاسه كأن اللى فات ده كله صفحه مطويه …وعايزه ابتدى من جديد …اعتبر نفسى لا قابلت سالم ولا اشتغلت فى المعرض بتاعه ولا اتلطمت عبال مالقيت ولادى ..اقولك ولا حتى اتسجنت …وارجع هاله بتاعه زمان …زمان اووى قبل حتى ما اتجوز عادل
اقرت امانى بصدق: والله يابختك… ياريتنى ابقى زيك وامحى اللى فات كله باستيكه
هاله بواقعيه: عمره ما هيتمحى يا امانى ..لانك برضه اتعلمتى منه حاجات كتير
امانى باهتمام : وقررتى هتعملى ايه فى اللى جاى ؟
ابتسمت هاله وقال : النهارده كنت مع حاتم ..اديته كل الورق اللى كان فى خزنه البنك وحكيتله عن كل اللى حصلى مع سالم قبل كده… كمان اديته الاوراق اللى جبتيها من الشركه ..وقررت مافكرش فى اللى جاى وحقى عند ربنا مش هيروح
تهلل وجه امانى : عين العقل يا هاله ..ايوا كده فرحينى بالاخبار الحلوه دى …واكيد حاتم هيثبت براءتك ويرجعلك حقك
هاله بلامبالاه: تصدقى بجد مابقيتش فارقه معايا …زى ماتقولى النار اللى جوايا بردت
