خلف الظلال الجزء الآخير بقلم يسرا مسعد
هاله بتوتر شديد : انت مين ؟ مين اللى باعتك ..وفين ولادى ..عايزين منى ايه ؟
قال الرجل بنفس الابتسامه الصفراء : هتعرفى كل حاجه بس ادينى الموبايل الاول ..واطمنى انا عندى اوامر مشدده انى ما المسش شعره من راسك ..فمافيش داعى للقلق وياريت تسمعى الكلام عشان تشوفى ولادك تانى
اعطته هاله الهاتف بعين دامعه واقلعت السياره بسرعه فائقه
واخذت هاله تراقب الطريق فوجدت ان السياره قد اتخذت طريقها الى خارج القاهره
فالتفتت الى الرجل جوارها وقالت بخوف : احنا رايحين فين ؟
الرجل باختصار: لولادك
هاله برجاء : مين باعتك ؟
قال الرجل بنفاذ صبر : بعدين بقى …اما توصلى هتعرفى …
قالت هاله بهيستريا : انا عايزه اعرف دلوقتى ..حرام عليك …انتو عايزين منى ايه ….
تنهد الرجل وهز رأسه اسفا واخرج من جيبه ” سرنجه رفيعه” وحقنها بدقه فى عنق هاله التى لم تتوقع هجومه عليها بالمحقن…
وماهى الا ثوان معدوده حتى تنرنحت هاله فى جلستها وشعرت بالظلام يقتحم عالمها وتراخت جفونها ومال رأسها باتجاه النافذه
فردد الرجل بلامبالاه : انتى اللى اضطريتينى لكده
اجابه السائق غاضبا بصوت غليظ: الباشا مش هيعجبه عملتك دى.. قالك ماتلمسش شعره منها
رد الرجل حانقا: وانا كان فى ايدى ايه… كانت هتفضل لحد ما نوصل للسخنه تصرخ وتعيط …كده اريحلها واريحلنا .سوق انتى وخلى بالك من الطريق ..مش عايزين لجنه توقفنا لنروح فى داهيه
وعلى الجانب الاخر …غادر رفيق المعرض بخطوات مسرعه واستقل سيارته الى خارج حدود القاهره واخرج هاتفهه وقام بمحادثه حاتم
فرد الاخير منزعجا : كنت بقالى كتير مستنى تليفون منك
رفيق بحسم: اسمعنى كويس …سالم خلاص بيجهز للعمليه الجايه
حاتم بشك : وانت ايش عرفك ؟
رفيق بغلظه: مش مهم عرفت ازاى …المهم تسمع اللى هقولهولك
قاطعه حاتم وقال: الاول ..انت متأكد انك مش متراقب ؟
رفيق : اطمن انا راكب عربيه مأجرها النهارده.. ومعايا شريحه جديده هرميها بعد ما اخلص..
اطمئن حاتم وقال : طيب كويس ..هاه كنت هتقول ايه ؟
رفيق : سالم شايل البضاعه فى المعرض بقاله اكتر من شهر
حاتم : ايه ..انت متأكد
رفيق بنفاذ صبر : ايوا ..اسمعنى وماتقاطعنيش… شايلها فى..3 عربيات وهيتحرك بيهم للمشترى بكره ..انا طبعا ما اعرفش لسه هيتحرك بيهم لفين وامتى لكن اول ما اعرف هكلمك تانى …بس هوا احتمال كبير اووى يكون بالليل متأخر
