خلف الظلال الجزء الآخير بقلم يسرا مسعد
فقال بصوت مضطرب : خلاص .خلاص بقى ماتعيطيش ..
ثم استجمع شتاته وقال بعزم : بس هيا لو ماكنتش عارفه كنتى هتقوليلها مش كده ؟
ردت هاله نافيه : انا كنت هطمنها عليا مش اكتر…لكن والله ماكنتش هجيبلها سيره …يعنى هيا فى ايديها ايه تعمله ..عشان اقلقها على الفاضى
قال بعند : وماقولتليش ليه ؟
هاله : خفت ترفض …ثم اقتربت منه وقالت بتوسل : سالم ..ارجوك سيبنى امشى ..
لمعت عيناه بغضب وقال لها : تمشى ….عشان ترجعى للظابط ..يقوم يدبسك فى قضيه ولا تشهدى معاه ..هوا يترقى وياخدله 30 …40 اهيف ..وانتى يجرالك حاجه انت وولادك …
هاله برجاء: هوا قالى انه هيثبت براءتى ويرجعلى فلوس الكفاله اللى المحكمه اخدتها فى قضيتى
سالم هازئا : وكانو كام ان شاء الله
هاله بعند: مش مهم كام ..المهم انهم حلال ..
سالم ببرود: انتى تشيلى الموضوع ده من دماغك خالص ….فلوس الدنيا مش هتعوضك عن واحد من عيالك لو جراله حاجه
هاله قانطه: طيب انا هفضل قاعده هنا اعمل ايه بالظبط
سالم بعصبيه: مالكيش فيه …انا هتصرف
هاله بهدوء: تتصرف ازاى ؟ ماتفهمنى طيب
سالم بصوت صارم: قولتلك هتصرف ومش عايز كلام كتير فى الموضوع ده ومشيان مش هتمشى…. واتفضلى دلوقتى اطلعى اوضتك ماشوفش وشك براها… ولو عوزتى حاجه اندهى اى حد يعملهالك
هاله متهكمه : حد من اللى شايلين سل*اح فى الجنينه
نظر لها سالم بقسوه وقال : لاء مش دوول ….دول شغلتهم الحمايه
اقرت هاله : انا ساعات ببقى خايفه منك اووى …
اقترب منها سالم وقال لها مستنكرا : وانتى شايفه فى ايدى س/لاح رافعه فى وشك يا هاله ؟
هاله مؤكده: لكن معاك س*لاح دلوقتى صح ولا غلط
زم سالم شفتيه وقال : الامر مايسلمش …وانا عمرى مامشيت منغير س*لاح
هاله : وعندك استعداد تق*تل اى حد بيه
سالم : اللى يحاول يأذينى …ولا اسيب نفسى لده ولده ينهشوا فى لحمى …
هاله بعند: يابخت من بات مظلوم ولا بات ظالم
سالم متململا: المثل ده للضعاف …وانا مش ضعيف …وبعدين كفايه بقى كلام فى الموضوع ده ..فكرك انا ماحاولتش اتغير ..حاولت ..وكتير كمان …لكن دايما كانت بتطلع حاجه ترجعنى للى فات ..ده قدرى وانا راضى بيه …ومرتاح كده ..الدور والباقى عليكى انتى ..مش عارفه انتى عايزه ايه …مش عايزه فلوس عادل لكن كنتى عايشه معاه ..طلعتى من السجن والمفروض تقولى ياحيطه دارينى بتجرى وره المشاكل …عايزه تساعدى الظابط …ونسيتى حمايه ولادك …
