خلف الظلال الجزء الآخير بقلم يسرا مسعد
اقترب منها سالم وامسكها من ذراعيها وقال لها : انا لو كنت عايز اذيكى ما كنتش تعبت روحى اجيبك انتى وولادك هنا …انا لوكنت عايز ااذيكى كان كفايه اووى اخد ولادك بعيد عنك وانتى عارفه كده كويس
دفعت هاله يداه بعيدا: امال عايز منى ايه ؟
سالم بتصميم: اعرف قولتى ايه للظابط
لم تجد هاله مفرا من اجابته بصدق : فتحتله الخزنه اللى فى البنك
سالم بشك : وهيا الخزنه كان فيها ورق تانى ؟
هاله : ايوا كان فيها ورق وفلوس ودهب كمان
نظر لها سالم غاضبا وقال: وانتى ماقولتليش ليه على بقيه الورق
هاله حانقه: انت طلبت الورق اللى يخصك جبتهولك …بقيته مايخصكش فى حاجه
رد سالم غاضبا وبصوت مرتفع : انتى غبيه ..ازاى تعملى حاجه زى كده ..حتى لو ميخصنيش ..انا قبل كده منبه عليكى ان عادل ليه اعداء ياما ..تقومى تروحى انتى بكل بساطه تدى الورق للظابط
تراجعت هاله خطوه للخلف ثم قالت مستنكره: انت بتزعق فيا ليه …
سالم حانقا: وانت عيزانى بعد عملتك السودا دى اطبطب عليكى ..تقدرى تقوليلى استفتدى ايه ..اخدتى ايه بالمقابل ؟
هاله بعناد : بالمقابل البلد هتنضف والحق هيرجع لصاحبه
حملق بها سالم بوجه احمر وانفاس اشتاطت غضبا وقال لها : حق ايه ..هه؟ حق مين ؟ انتى مالك انتى ؟اللى ليه حق يروح هوا يدور عليه ..انتى خليكى فى حالك وربى ولادك بعيد عن كل ده
ردت هاله بنفاذ صبر وهى متجهه الى باب الحجره وحاولت فتح الباب : متشكره يا سيدى على النصيحه ….سيبنى بقى امشى واخد ولادى عشان اربيهم
اندفع سالم تجاهها وجذبها من ذراعها وقال بخشونه: لهو انتى فاكره انى هسيبك بعد ماعرفت بعملتك دى تخطى خطوه بعيد عن عينى… ده بعدك
دفعت هاله يده بعيدا وقالت غاضبه : وانت مالك بيا..ماتخليك فى حالك ؟
جذبها سالم بقوه ولفحت انفاسه وجهها بشده : انتى حالى ..ومش هتمشى من هنا …ومن هنا ورايح هتفضلى تحت عينى لحد ما نمشى من البلد
هاله متعجبه : نمشى من البلد !!!!!.نمشى نروح فين ..ان كنت انت عايز تمشى امشى ..وامشى من دلوقتى كمان ياريت ..لكن انا مش هسيب بلدى
لمعت عينا سالم وتركها ونظر لها بعمق وقال بتأن : امشى من دلوقتى ؟؟؟؟…ليه ؟ .
ظلت هاله تحملق به صامته ..خائفه .مرتجفه …فقال لها حانقا : ليه ؟ ردى عليا …
فرت دمعه من عين هاله وقالت بصوت ابح : حاتم عنده ادله ضدك ..وهيقبض عليك ..انت والمرشدى
