خلف الظلال الجزء الآخير بقلم يسرا مسعد
هاله مؤكده: ااه سالم يومها نسى ياخده منى ….ومن يومها وهوا معايا فى سلسله المفاتيح ..اهوه
حاتم بفرح : طيب جميل اووى نطلع دلوقتى على البنك نشوف الخزنه فاضل فيها ايه ..
ثم اضاف بحنق :لكن انتى ماشوفتيش الورق اللى اديته لسالم ده كان محتواه ايه بالظبط ؟
هاله بخبث: لاء ماشوفتش ..بس …
حاتم متلهفا :بس ايه ؟
ابتسمت هاله وقالت : عادل كان مصور منه 3 نسخ وشابكهم فيه ..انا طبعا اخدتله الاصل وسيبت الصور
فتح حاتم ذراعيه بحركه لا تلقائيه وقال بفرح طفولى : مش عارف احضنك ولا اعمل فيكى ايه ؟
حملقت به هاله دهشه وقالت مستنكره : ودينى البنك وانا افتحلك الخزنه …وياريت بعدها توصلنى لاقرب مكان عشان ارجع البيت قبل الاولاد يبقى كتر خيرك
استقلت هاله السياره برفقه حاتم وذهبوا سويا لمقر البنك وما ان وصل حاتم حتى قالت له هاله : تخليك هنا احسن ولا تيجى معايا ؟
حاتم : لاء طبعا هاجى معاكى يالا بينا
وفى الغرفه المغلقه الهادئه ذات اللون الرمادى الفاتح …كانت هاله تقف الى جوار حاتم ريثما ينتهى الموظف من الاجراءات الروتينيه الخاصه بعمله
حتى قال اخيرا : الخزنه تحت امركم يافندم اى خدمه تانيه
شكره حاتم وقال : متشكرين جدا 10… دقايق ونخلص ان شاء الله
انصرف الموظف بهدوء وفتحت هاله الخزنه بالمفتاح واخرجت لحاتم جميع الاوراق التى بداخلها حتى لمح حاتم شيئا يلمع بداخلها
فقال مستفسرا : ايه ده ؟
ردت هاله بلامبالاه : سبايك دهب
فغر حاتم فمه ونظر لها ببلاهه وقال : وبتقوليها عادى كده
نظرت له هاله بتعجب وقالت : والمفروض اعمل بيها ايه يعنى ؟
ضحك حاتم ضحكه متوتره وقال لها : تعملى بيها ايه …يعنى ايه تعملى بيها ايه ..هيا الناس بتعمل ايه بالدهب والفلوس ؟
قالت له هاله ساخره : ايه قصدك انى ابيعهم يعنى؟
اقترب حاتم من الخزنه وبدأ فى تحريك القطع الذهبيه الثقيله وقال لها فى ذهول : دوول 7 سبايك.. الواحده كيلو ..يعنى 7 كيلو دهب ..انتى عارفه الجرام الواحد وصل كام النهارده ؟
قالت هاله بتهكم : لا والله …اخر تعاملى مع تجار الدهب يوم مارحت ابيع شبكتى عشان البيه كان عاوز فلوس يدخل مشروع مع واحد
حاتم متشككا : يعنى انتى هتفضلى سيباهم كده فى البنك وتفضلى عايشه مع امانى فى الحاره وتدورى على شغل تاكلى منه عيش انتى وولادك ؟
