خلف الظلال الجزء الآخير بقلم يسرا مسعد
الفصل السادس والعشرون
وقفت هاله لبرهه تحدق فى وجه حاتم الغاضب ولوهله خيل اليها ان تسير وتتجاهل حقيقه وجوده
الا ان العزم الصارخ بوجهه اجبارها على ركوب سيارته
بعدها انطلق حاتم بسرعه جنونيه فى الطريق الخاوى …حتى قالت له هاله بتوتر شديد : انت مركبنى معاك عشان تقت*لنى فى حادثه ..هدى السرعه شويه
القى حاتم عليها نظره غاضبه وابطأ سرعته قليلا حتى توقفت السياره عن الحركه على احدى جانبى الطريق …
وظل الصمت هو سيد الموقف الاعظم …. الا ان صوت تنفس حاتم المرتفع.. قد افقده وقاره…
التفت هاله اليه وقالت فى ضيق : نعم …افندم ياحضرة الظابط ؟
حاتم بضيق بالغ : ازى حبيب القلب ؟
حملقت به هاله غاضبه وصكت اسنانها ثم قالت بحنق شديد : الزم حدودك لو سمحت
قال حاتم بخشونه : كنتى عنده بتعملى ايه يا هاله ؟
رفعت هاله احد حاجبيها والقت عليه نظره جاده وقالت ببرود : مش شغلك
شعر حاتم انه قد اجتمعت الشياطين امامه ونفثت لهبيها الحار فى عروقه ….فقال بنفاذ صبر : هاله ماتنططيش العفاريت فى وشى …ردى عليا كنتى عنده بتعملى ايه …ايه العلاقه اللى تجمعك بواحد تاجر مخدرات وقتال قت/له
هاله حانقه: ماتقولش عليه كده
اخذ حاتم نفسا طويلا وحاول الهدوء ثم قال بصوت ثابت : يعنى ايه ما اقولش عليه كده ..انتى فكرانى بتبلى عليه …يا هاله فوقى ..فوقى وبطلى جنان ومقاوحه …سالم مش الحمل الوديع اللى انتى فكراه ..ده كتله شر متحركه
تنهدت هاله وارتجفت شفتاها واوشكت دموعها على الانهيار ولكنها مع ذلك قالت بصوت مخنوق : عارفه …خلاص ارتحت ..عارفه
حاتم غير مصدقا : ولما انتى عارفه ..روحتيله المستشفى ليه ؟
هاله قانطه: كنت فاكراه ممكن يتغير
حاتم حانقا متهكما : هه يتغير …عشم ابليس فى الجنه …
هاله بنبره حملت اتهاما مريرا : انت بتكرهه
حاتم مؤكدا : ايوا طبعا بكرهه ..مافيهاش ذره شك واحده …ازاى عايزانى مكرهش واحد بيدمر شباب البلد ..ولاد وبنات وبيدخل س*لاح للمجرمين يق*تلو بيه الناس …وبيسرق وبينهب ويمص دم غيره عشان هوه يعيش ..ومش اى عيشه …
اشاحت هاله برأسها بعيدا عنه خجلا واستياءا
فأردف حاتم : انتى صحيح ساعدك وجابلك عيالك لحد عندك ….بس اقسملك بالله لو حد من عيالك وقف فى مصلحه ليه …ليمحيه من على وش الارض عشان مصلحته …ياهاله فكرى بعقلك وماتقوليش جميل عليا والكلام الفارغ ده ..سالم مابيعملش حاجه الا اذا كان قصادها مقابل …وان مطلبوش دلوقتى منك هيطلبه بعدين ولازم هيدفعك تمنه ..انا عارفه كويس بقالى 4 سنين معاه فى لعبه القط والفار دى …بس خلاص نهايته قربت واللى حواليه هما اللى هيخلصو منه
