حجر الشيطان الجزء الثالث
لتلتفت إليه تنظر إلى عينيه قائلة بارتباك:
آه..لأ طبعا مغيرتش..احم..إطلع بينا يلا؟
نظر إلى عمق عينيها وهو يقول:
على فين؟
قال قلبها (جهنم) وقال لسانها (الروشة) .
********************
دلف مروان إلى حجرة المكتب ليجد سوزى التى نهضت على الفور لدى رؤيته واقتربت منه تمد يدها إليه قائلة فى دلال:
ازيك يامروان..عامل إيه؟
سلم عليها وهو يضغط على يدها ليقفز قلبها فرحا وهو يقول:
أنا تمام ياسوزى..وحشتينى.
قالت فى لهفة:
بجد يامروان وحشتك..ولا بتجاملنى؟
مال عليها ينظر إلى عينيها مباشرة.. تلفحها أنفاسه الساخنة وهو يقول:
لو مكنتيش وحشتينى مكنتش قلتهالك..وبعدين مش معقول تكونى شاكة فى جمالك ورقتك اللى ممكن يأثروا على أي راجل.
اقتربت منه أكثر وهي ترفع يدها تمرر أظافرها الطويلة المطلية بعناية على وجنته قائلة :
أي راجل فى الدنيا إلا أنت..ياما تعبتنى وسهرتنى الليالى عشان أسمع منك الكلمتين دول وإنت ولا إنت هنا..وده اللى محيرنى يامروان..إشمعنى دلوقتى؟
أمسك مروان بيدها يقبلها فى نعومة خلبت لبها وأطارت عقلها لينظر إليها مجددا وهو يقول:
أياميها كنتى مرات بابا وكان مستحيل أبصلك ولو كنتى ملكة جمال..إنما دلوقتى……
وترك جملته معلقة لتظهر السعادة على وجهها وهي تقول:
بجد فرحتنى بكلامك يامروان..لدرجة إنى حاسة إنى طايرة فى السما.
إبتسم داخله بسخرية ولكنه قال فى نعومة وهو يترك يدها مشيرا إلى المقعد المواجه لمكتبه قائلا:
طب إنزلى على الأرض يابرنسيسة وأقعدى عشان نتكلم فى الشغل..مبقاش فيه وقت.
ليتركها ويتجه إلى مقعده بينما قالت هي بإحباط:
نزلت ياسيدى..ها..قول اللى عندك.
جلس يبتسم قائلا:
مش أنا اللى عندى كلام أقولهولك..انتى اللى عندك قرار هتقوليهولى حالا..معانا ولا مش معانا؟
جلست قائلة:
معاكم طبعا.
أحس بالإنتصار ليقول بإبتسامة حقيقية:
كدة تمام أوى..يبقى هنمضى العقود بكرة فى جحر الشيطان.
عقدت حاجبيها قائلة:
بكرة كدة علطول؟
ابتسم قائلا:
طبعا علطول.
ليشير إلى هاتفه القابع على مكتبه وهو يقول:
الناس لسة مكلمينى النهاردة وهيبعتوا البضاعة على آخر الأسبوع فلازم نكون جاهزين ونمضى معاهم العقود بكرة.
قالت سوزى بهدوء:
تمام..بكرة نتقابل ونمضى العقود..و…..
قاطع كلماتها صوت طرقات على الباب ليسمح مروان للطارق بالدخول وهو يعرف هويته مسبقا..لتظهر فاتنته على الباب..ترمق سوزى بنظرة حادة بادلتها إياها سوزى لتتجاهلها زينة تماما وهي تنظر إلى مروان قائلة:
ممكن كلمة على إنفراد؟
