حجر الشيطان الجزء الثالث
********************
قال نبيل فى حزن:
هي دى كل الحكاية يادارين..صحيح احنا كنا جايين ننتقم من أخوكى بس لا أنا ولا فتون قدرنا نكمل.
قالت دارين :
وإيه اللى منعكم؟
نظر نبيل إلى عمق عينيها قائلا:
قلوبنا يادارين..كل واحد فينا اتعلق بحد من عيلة تاج الدين..على فكرة أنا عمرى ما فكرت ولو للحظة واحدة إنك تدخلى فى لعبة الانتقام ..ولا كنت أعرفك قبل ما آجى الشركة..ومن اول ثانية شفتك وانا قلبى حبك..بقيت أدور عليكى بعينية كل ما آجى الشركة..مكنتش اعرف انك أخت ياسين..ولما عرفت ورغم يأسى من إن يكون لينا مستقبل مع بعض..لقيتنى بحبك أكتر..مكنش بإيدى والله أبعد عنك..انتى شفتى بنفسك أد إيه بحبك وبغير عليكى..أكيد حسيتى بمشاعرى دى..الحب بيتحس يادارين..طمنينى وقوليلى إنك حسيتى بية..وإنك مصدقانى.
أطرقت برأسها وظلت صامتة ليمد يده يمسك بيدها الرابضة على الطاولة لترفع عينيها إليه تملؤها الحيرة..ليقول برجاء:
طمنى قلبى يادارين واوعى تقولى إنك محستيش بية..أو إنك بطلتى تحبينى.
قالت فى ألم:
وحتى لو لسة بحبك ومصدقاك..تفتكر هنقدر نكمل مع بعض ..أخويا مش هيفضل بينا؟كرهك ليه مش هيندمك على إنك أخترتنى وحبيتنى؟وفتون هتعمل إيه؟
قال فى قوة:
كفاية إنى أعرف إنك بتحبينى ومصدقانى وده يخلينى أتحدى الكون كله علشانك..أما بالنسبة لفتون فهي بنفسها اللى قالتلى روح وراها ومتخسرهاش وتكسر قلبك..انتى متعرفيش يادارين أنا بحبك أد إيه..انتى اول واحدة أحس ناحيتها بكل المشاعر دى.
قالت دارين فى يأس:
أنا كمان يانبيل اول مرة أحس بالمشاعر دى ناحية حد..أنا كمان بحبك أوى..بس.
قاطعها نبيل وقد إلتمعت عيناه من السعادة قائلا:
من غير بس..ده كفاية أوى عشان نتحدى اي شئ هيواجهنا.
نظرت إلى عينيه قائلة :
أنا معاك يانبيل بس..
كاد أن يقول شيئا لتقاطعه قائلة بسرعة:
بس فيه حاجة لازم تعرفها..
عقد حاجبيه لتنظر إلى عينيه بثبات قائلة:
أخويا ياسين مقتلش ميسون..اللى قتلها واحد تانى خالص.
اتسعت عينا نبيل فى صدمة ودارين تحكى له كل شئ تعرفه.
*********************
صرخت سوزى بإنهيار قائلة:
إلحقنى ياعدنان..البوليس عندى ..جاي يقبض علية..بيقولوا الصفقة اتمسكت وروحنا كلنا فى داهية.
اتسعت عينا عدنان فى صدمة وهو ينهض قائلا:
انتى بتقولى إيه ياسوزى؟
