حجر الشيطان الجزء الثالث
نظرت إلى عينيه فى حيرة عاجزة عن الكلام وهو يستطرد قائلا:
إحساسى بإنك ممكن تكونى بتحبينى وإنك مش هتقدرى تإذينى هو اللى خلانى قادر أعيش بعد ما عرفت إنتى جيتى مصر ليه..متتصوريش لما عرفت كانت حالتى إيه؟ومتتخيليش لو واحدة غيرك كانت فكرت بس إنها تإذينى أنا كنت عملت معاها إيه؟
قالت فى صدمة:
انت..انت كنت عارف.
أومأ برأسه قائلا:
من يوم دادة محسنة ماغلطت فى الكلام وانتى بصيتى ليها وأنا شاكك فى الموضوع..خليت تحري شاطر يدور وراكى وفى آخر يوم لينا فى بيروت..عرفت إنك أخت ميسون وإنك بتدورى عن اللى قتل أختك من فترة وأكيد جيتى مصر علشان تنتقمى منه وده فسرلى حاجات كتير كانت غامضة بالنسبة لى.
أزالت يده من على كتفيها قائلة:
وليه مواجهتنيش ؟ليه كملت فى اللعبة..ده انت كنت هتمضى العقد أدامى.
ابتسم قائلا:
كنت مراهن نفسى إنك هتمنعينى..قلتلك قلبى كان حاسس إنك لا يمكن هتإذينى.
نظرت إليه قائلة فى غضب:
وأنا قلتلك إنى مش مبسوطة وإنى بكره نفسى دلوقتى عشان مقدرتش آخد حق أختى منك..أختى اللى كلمتنى يوميها وكانت طايرة من السعادة عشان ياسين جايلها وعملها مفاجأة..أتارى المفاجأة كانت قتلها..ذنبها إيه أختى عشان تقتلها..عملتلك إيه ياياسين عشان تحرمها من الدنيا دى..رد علية..ها..ذنبها إيييه؟وذنبى ايه انا كمان..قوللى؟
نظر إلى عمق عينيها قائلا:
أختك كانت حبيبتى ..واللى مفيش واحدة قدرت تاخد مكانها فى قلبى من بعدها غيرك إنتى..إزاي بس تفتكرى إنى ممكن أأذيها؟..انتى عرفتينى كويس ولو مكنتيش من جواكى واثقة إنى مش ممكن أكون الشخص ده ..مكنتيش حبيتينى.
عقدت حاجبيها فى حيرة قائلة:
قصدك إيه بالكلام ده؟
نظر إليها بثبات قائلا:
قصدى إنى روحتلها فعلا فى اليوم ده وكنت محضرلها مفاجأة زي ما قالتلك وهي إنى كلمت أهلى وجبت الدبل..كانت فى جيبى..بس لما روحت عندها …
ليبتلع غصة فى حلقه وهو يتذكر ذلك المشهد الذى يبدوا متجسدا أمامه فى كل مرة يفكر فيه وكأنه فقط بالأمس ولم يمر عليه سنوات..ليظهر الألم على ملامحه ونبرات صوته وتستشعره فتون لتتسع عينيها بقوة وهو يستطرد قائلا بوجع:
لقيت الباب مكسور..ولقيتها أدامى على الأرض..والدم مغرقها..جريت عليها شلتها بين إيدية جسيت نبضها لقيته مش موجود ولسة هصرخ بإسمها حسيت بضربة على راسى ومحستش بالدنيا بعدها.
