حجر الشيطان الجزء الثالث
نظرت إليه فى حيرة..لاتدرى ماذا تقول؟أتحكى له عن هذا الكابوس المتكرر والذى لاتدرى له تفسيرا..أتقول له أنها تشعر بالقلق من كابوس راودها عنه؟سيظنها بالتأكيد قد جنت..لذا قالت بتوتر:
أبدا..ياسين بس واحشنى ..متعودتش يغيب عنى وعن تيتة بالشكل ده..ياسين بالنسبة لينا مش بس أخ..لأ..أب وأخ وسند..لما بيغيب بحس ان روحى بتغيب معاه ..وعشان كدة تلاقينى قلقانة ومش مرتاحة.
أحس بالذنب يتآكله ليقول بتوتر:
ربنا يخليهولكم يادارين..
ثم مالبث أن تمالك نفسه ناظرا إلى عينيها قائلا:
وعلى العموم أنا هنا مكانه..لو احتاجتينى فى أي وقت أكيد هتلاقينى.
شعرت بالارتياح وأن قلقها لا مبرر له..لتقول :
أنا مش عارفة أشكرك إزاي على كلامك ده.
رفع يده يقرصها بخفة من وجنتها قائلا :
مفيش شكر بينا..مفهوم؟
أومأت برأسها وهي تبتسم تلك الابتسامة الخلابة ليتيه فيها نبيل وتتركز عيناه على شفتيها ثم ينظر إلى عينيها الجميلتين واللتان وقعتا تحت سحر نظراته فلم تحرك ساكنا ليفيقا سويا على صوت فتون وهي تقول:
احمم..أنا جيت فى وقت مش مناسب ولا إيه؟
نهضت دارين على الفور وهي تشعر بالخجل لتتحول وجنتاها إلى اللون الأحمر القاتم..بينما قال نبيل بثبات:
حمد الله ع السلامة يافتون.
نقلت فتون نظراتها بينهم قائلة :
الله يسلمك يانبيل..إزيك يادارين؟
قالت دارين فى خجل:
أنا تمام..حمد الله على سلامتك.
ابتسمت فتون قائلة:
الله يسلمك..على فكرة ياسين بيدور عليكى.
ضربت دارين على رأسها بخفة قائلة:
ياسين ..إزاي نسيت؟..أكيد جه معاكى..عن إزنكم..أنا رايحاله حالا.
تابعها نبيل وهي تغادر بعينيه فى حنان..ليسمع فتون وهي تقول بعتاب:
أنا قلتلك وقعها فى حبك..مش تقع انت كمان فى حبها..كدة الموضوع هيكون صعب عليك زي ماهو هيبقى صعب عليها يانبيل.
نظر إليها نبيل للحظة قبل أن ينهض قائلا بهدوء:
ومين قالك انى ممكن اجرحها أو أزعلها؟مين قالك إنى ممكن أكسر قلبها..أنا بحبها ومستحيل هعمل كدة يافتون.
نظرت إليه فتون قائلة بثبات:
وتفتكر لما تعرف ان احنا السبب فى سجن أخوها وضياع فلوسه..مش هتزعل..مش هينكسر قلبها..تفتكر ساعتها هيكون ليكم مستقبل مع بعض؟
زفر نبيل وهو يمرر يده فى رأسه بضيق:
مش عارف يافتون..مش عارف.
اقتربت منه تضع يدها على كتفه قائلة:
هتصدقنى لو قلتلك إنى حاسة بيك..بس اللى احنا ابتديناه لازم نكمله يانبيل..ده تار أختى ومش ممكن هسيبه حتى لو هضحى بنفسى وقلبى عشان أحققه ..صدقنى مش هتردد..بس المسألة هنا هتكون معايا يانبيل ولا مش معايا؟
