حجر الشيطان الجزء الثالث
********************
دلفت سوزى بطلتها الساحرة و المعهودة..تبدو فاتنة واثقة من نفسها لمن لا يعرفها..ولكن مروان يعرفها حق المعرفة..يدرك أنها تخفى حية سامة خلف مظهر خلاب..يشعر بكل ذرة فى كيانه.. نافرة مشمئزة من تلك المرأة ولكنه أخفى مقته خلف مظهر هادئ وهو يقف مستقبلا إياها بطلته الساحرة لتتأمله سوزى بعيون راغبة..تتطاير شراراتها لتصل إليه بوضوح..ولكنه تجاهل تلك النظرات وهو يراها تمد يدها إليه ليمد إليها يده بدوره يسلم عليها لتضغط على يده وهى تقترب منه قائلة بدلال:
وحشتنى يامروان..يعنى لو مسألتش عليك..متسألش علية؟
ترك مروان يدها وابتعد يتجه لمقعده خلف المكتب قائلا:
إزاي تقولى كدة بس؟..طب ده أنا لسة كنت بفكر فيكى.
قالت فى لهفة:
بجد يامروان؟بتفكر فية إزاي؟
ابتسم فى سخرية وهو يجلس على مقعده قائلا:
طب اقعدى بس الأول وأنا أقولك.
جلست قائلة:
قعدت أهو..قول بقى إزاي؟
مال للأمام قائلا:
مش كنتى عايزانى أشغلك فلوسك معايا؟
تراجعت فى مقعدها تشعر بخيبة الأمل ولكنها قالت بهدوء:
آه..طبعا ..عايزة .
ابتسم قائلا:
وأنا لقيتلك الفكرة اللى هتخليكى مش بس هتشغلى فلوسك معايا ..لأ.. وهتكسبى مليارات كمان.
اتسعت عيناها فى جشع لبيتسم مروان بداخله وهو يدرك أنها ابتلعت الطعم..خاصة وهي تقول:
إزاي بقى؟
تراجع مروان فى مقعده قائلا:
صفقة هتدخلى فيها معايا ومع شريك تالت كمان..الصفقة دى هنجيبها من برة بملاليم وهنبيعها هنا بمليارات..ها إيه رأيك؟؟
تظاهرت سوزى بأنها لا تعرف شيئا عن تلك الصفقة وهي تقول:
والصفقة دى عبارة عن ايه ؟ومين شريكنا التالت؟
كادت ضحكة ساخرة ان تنفلت من فم مروان ولكنه تمالك نفسه فى اللحظة الأخيرة قائلا:
شريكنا التالت إسم معروف عندنا فى عالم الأعمال بالشيطان.
حاولت إدعاء الدهشة وهي تقول:
مش معقول..عدنان المسيرى مرة واحدة؟
أومأ مروان برأسه..ليستطرد قائلا:
وليه لأ؟الصفقة كبيرة وفى مجال خطير..ومحتاجة حد تقيل وخبرة معانا زي عدنان.
عقدت سوزى حاجبيها قائلة:
انت قصدك ان الصفقة دى عبارة عن…..
قاطعها مروان قائلا:
سلاح ومخدرات.
لتتظاهر سوزى بالصدمة قائلة:
سلاح ومخدرات..لأ طبعا ..المجال ده خطير وممكن يودينا كلنا فى داهية.
تراجع مروان يستند إلى مقعده قائلا بلامبالاة:
مع قوة وسلطة ومعارف عدنان ومع دماغى ..معتقدش ممكن يبقى فيه أي خطورة علينا..عموما ده اللى أدامى دلوقت..وتعرفى لولا العشرة القديمة وإنك لجأتيلى عشان اشغلك فلوسك أنا مكنتش عرضت عليكى الصفقة دى..أنا لو كنت اقدر عليها لوحدى مكنتش دخلت شريك معايا..أرباح الصفقة دى مليارات زي ما قلتلك..والطبيعى انى احب يكون مكسبها كله لية لوحدى.
