حجر الشيطان الجزء الثالث
التمعت عينا سوزى قائلة :
وانا كمان هعمل القرية السياحية اللى نفسى فيها.
نظر إليها عدنان قائلا:
هو لسة مصمم يدخلك شريكة معانا ياسوزى؟
قالت سوزى بحدة:
وانت عندك مانع ياعدنان؟
ابتسم عدنان ابتسامة شيطانية مثله وهو يقول:
لأ طبعا ياحبيبتى..إيه اللى هيخلينى أرفض بس؟
نظرت إليه سوزى قائلة بسخرية:
المليارات اللى هاخدها واللى أكيد كنت هتبقى عايزها لوحدك.
اتسعت ابتسامته الخبيثة قائلا:
وأنا وانتى إيه ياسوزى..مش واحد؟
تراجعت سوزى فى مقعدها وهي تضع قدما فوق الأخرى قائلة:
مش عارفة ياعدنان..قول إنت.
مال ينظر إلى عينيها وهو يقول بغمزة:
تحب أثبتلك وحالا على المكتب ده.. إن احنا واحد ياسوزى.
انطلقت ضحكتها لتقول بعدها:
مفيش فايدة فيك ياعدنان..دماغك دايما شمال.
ابتسم عدنان قائلا:
وماله الشمال ..ماهو اللى معيشنا فى العز ده كله..المهم خلينا فى الشغل.
قام بالضغط على زر..ليسمع بعدها طرقات على الباب فيسمح للطارق بالدخول فإذا به هارون الذى قال بهدوء:
تحت أمرك ياعدنان باشا.
أشار له عدنان بالتقدم ليمد يده إليه بالفلاشة قائلا:
الفلاشة دى تتفرغ حالا وتتأكدوا من كل المعلومات اللى عليها..ولما تتأكد تدينى الأوكيه فى خلال ساعة بالكتير.
تناولها منه هارون وهو يعقد حاجبيه قائلا:
مش هنلحق ياباشا.
طرق عدنان المكتب بقبضته فى قوة وهو يقول:
لما أقول ساعة تبقى هي ساعة..ولو مش هتقدر عليها ياهارون..أجيب اللى يحل محلك ويقدر عليها..مفهوم؟
جز هارون على أسنانه وهو يتمالك نفسه من غضب اشتعل بأحشائه قائلا:
مفهوم ياباشا..عن إذنكم.
وغادر الغرفة لتقول سوزى:
تؤ تؤ..مش كدة ياعدنان.. هارون مساعد شاطر جدا وانت كدة هتخسره.
أشار عدنان بيده بلا إهتمام قائلا:
هارون واللى زيه كلاب..موجودين فى كل حتة ..يغور واحد..ييجى عشرة..المهم أنا عايزك بكرة بعد مانمضى العقد مع مروان تبقى زي ضله..عينك متنزلش من عليه أبدا..مفهوم؟
أومأت برأسها فى هدوء غافلين عن أذنين سمعت حديثهم وأدرك صاحبهما أنه بلا قيمة عند رب عمله..وأنه يجب أن يتخذ خطوة تجاه ذلك..ولكنه فقط سينتظر الوقت المناسب.
********************
كانت دارين تسير خلف نبيل الذى سبقها بخطوة..تتساءل فى حيرة عن سر عصبيته الشديدة اليوم..حتى إنه لم يتطلع إليها ولو لمرة واحدة لتنتابها الشكوك مجددا حول مشاعره تجاهها وها هما الآن فى مرآب السيارات الخاص بشركة ذلك المدعو توفيق..لتلتمع الفكرة فى رأسها فجأة وتتساءل أهذا ما يؤرقه..ذهابهما إلى توفيق؟ ..أكان من المفترض أن تقول له أنها لا تزد الذهاب معه؟لتقول بسرعة ودون تفكير:
نبيل !
