الفصل الأخير من الجزء الأول لولا الغرام روز أمين

-مفيش حاجة يا ماما، علي كان بيهزر معايا.

زفرت فاطمة بارتياح، ثم التفتت إلى علي سائلة باستغراب من بقائه بملابس المنزل:

– أنت ما لبستش لحد الوقت ليه؟!

أجابها بنبرة جافة:

-أنا مش جاي معاكم يا ماما.

اتسعت عيناها بدهشة وقالت:

– يا ابني إحنا مش متفقين إنك هتيجي معانا أنت ومراتك وولادك؟

نظر إلى أشرف بنظرة غامضة، وقال موجهاً كلامه لوالدته:

– تعبان، ضهري واجعني ومش قادر أسوق.

ردت عليه فاطمة بغضب وضيق عارم من موقفه:

– براحتك، خليك ماشي ورا مراتك لحد ما تخسرك أخوك وأهلك كلهم.

دافع عن زوجته بنبرة حادة:

-ومراتي إيه دخلها في الموضوع يا ماما؟

هتفت بنبرة تقطر غلاً وسخطًا:

-من يوم أوضة الأطفال اللي جبتها هدية لأخوك، وهي مش على بعضها، وأهي قلبتك على أخوك الوحيد، من تاني يوم ما نزل من السفر وأنت مش طايقه.

هتف علي بنفاذ صبر وحدة:

– ماما الله يخليكِ، خدي ابنك واتفضلوا على مشواركم، وأنا بايت هنا أنا ومراتي لحد ما ترجعوا.

رمقته بنظرة حادة مليئة بالخيبة، وتمتمت بأسى:

-يا خسارة على الرجالة لما بتخيب.

ثم أخذت بيد أشرف وقالت:

-يلا يا ابني، أبوك مستنينا في العربية، ولسه هنعدي على خالتك أماني وجوزها .

أشار علي بيده نحو الباب، وقال لأشرف بنبرة غاضبة:

-اتفضل.

تحركوا للخارج، وفي تلك الأثناء نزلت داليا من الطابق العلوي، ووقفت أمام زوجها تتفحص ملامحه المجهدة، وسألته بنبرة حذرة:

– عملت إيه يا علي، طمني؟

رفع كتفيه لأعلى بقلة حيلة وإرهاق شديد، وقال:

……….

(سنكمل هذا الحديث فلاش باك في الجزء الثاني من الرواية،منعًا لحرق الاحداث).

_______♕________

وصلوا إلى منزل صادق، حيث استقبلهم هو ومنى بترحاب حار، الحاج عزام وفاطمة، وأماني وزوجها، يتقدمهم أشرف الذي لسبب غامض انفصل عنهم وظل واقفًا بالخارج ولم يدلف معهم.

تفحص صادق الوجوه من حوله، ثم التفت إلى السيد عزام وسأله:

– أمال علي ومراته فين يا حاج؟

أسرعت فاطمة بالرد لتدارك الموقف قائلة:

– عندهم شغل مهم، ومعرفوش يستأذنوا.

أومأ صادق بتفهم هادئ، هبطت دليلة درجات السلم وروحها تسبق خطواتها، مدفوعة بلهفة عارمة لرؤية حبيبها، ولجت إلى الصالة متطلعة في الوجوه، لكن غياب أشرف أثار استغرابها الشديد، وقبل أن تسأل، شعرت باهتزاز هاتفها معلنًا عن اتصال منه.