فارس بلا مأوى الجزء السادس
إبتسم رغماً عنه و رد برومانسية حالمة تعزف علي أوتار فؤادها الصغير:
_ علي فكرة بجي أني صاحي من بدري لأچل لما تطلعي أعتذرلك وأجولك حجك عليا يا حبيبة جلبي، شوفتي أنتي ظلماني كيف!.
أخفت إبتسامتها وأرتسمت علي ملامحها الضيق والوجوم:
_ ياسلام! ، بعد كل الي سويته چاي تجولي حجك عليا وأني المفروض أدوس علي زرار و خلاص بجي أسامحك!.
أطلق زفرة وتمتم بالإستغفار ثم قال:
_ أني بعترف بغلطي وأني سلمت حالي للشيطان الي خلاني أتعصب، لكن كيف ماغلطت أنتي كماني غلطتي وعتكابري ومعوزاش تجولي أنك غلطانه، يبجي مين إكده المفروض يزعل من التاني؟.
فتحت فمها غير مصدقة لتقول له بدهشة:
_ بچد والله!، دلوق خلتني أني الي غلطانة، ماشي يا سيدي حجك عليا إن روحت لمرات خالي من غير ماأستأذنك، لكن كيف ما جولتلك أني إكده ولا إكده مكنتش جاعدة في الدار.
_ خابر بسبب زكريا الي چه ودخل ونسي إننا في الدار، أني أتحدت وياه جالي مكنش يعرف وعيعتذرلك.
رفعت زواية فمها بتهكم:
_ متشكرين.
رفع حاجبه وسألها:
_ شامم ريحة سخرية في حديتك، ما عچبكيش الي جولتهولك ولا أي عاد؟.
ردت بإنكار:
_ وأني عتمسخر ليه، أنت عتجولي أخوك أعتذر وأني عجولك متشكرين.
أطلق زفرة ويرمقها بنظرة يخبرها بعدم إقتناعه، لكنه لايريد خلاف مرة أخري يكفي ما سيخبرها به للتو:
_ بالمناسبة،بعد ما نفطرو هنعاود علي دار أبوي.
داهمها الشعور بالصدمة وأتضح ذلك علي ملامحها
_ كيف؟.
رد ليخبرها أن حديثه لارجعة فيه:
_ هو أي الي كيف، مالك حاسس إن رچوعنا لدارنا ما عاچبكيش.
جزت علي فكها بحنق لم تستطع إخفاء شعورها بالرفض حيال ما يخبرها به.
_ جصدك تجول دارك أنت.
_ وأنا وأنتي نبجو أي، واحد؟، ولا كل واحد لحاله!.
ردت بتأني لا تظهر له مدي سخطها من العودة إلي منزل والديه:
_ طبعاً واحد، لكن أني أتفاچأت لما عتجولي.
أمسك بيدها ليجعلها تجلس علي كرسي وجذب آخر و وضعه أمامها ليجلس مقابلاً لها :
_ بصي ياقمر لأچل نبجي واضحين، أنتي خابرة ظروفي زين، ما أقدرش أشتري شقة دلوق، ممكن نأچر شقة علي قدانا لحد ما ربنا يكرمني وأشتري لك شقة ملك، الي هيحوصل دلوق إننا هانرچع علي دارنا ومنها أجف ويا خايتي فاطمة وأشوف أي حكاية أخوي وأكون ويا أهلي لأچل يحتاچو حاچة مني.
