ندبات القدر الجزء الثاني
أمام اصراره وكلامه هذا لم يجد كلام الا انا قال : بنتي مش متعودة تخرج بالليل عشان كده هي مسؤولة منك لحد ما ترجع
=اكيد يا استاذ عبد الناصر
كان هذا رده باختصار وبعدها اقفل الهاتف استقام واقفا وقال : واضح ان بابا بيخاف عليكي اوي يا فاطمة
_بابا دا الحتة الحلوة اللي في حياتي كلها
ردت بابتسامة وحب حقيقي بدا جليا في عينيها
رد بابتسامة وقال : ربنا يخليكم لبعض، هاسيبك تكملي شغل
وما ان خرج حتى قالت بصوت هامس : وانت الحاجة التانية يا الياس
_________________________
استيقظ رازي بكسل بسبب نومه متأخرا الليلة الماضية دلف إلى المرحاض وبعدها ، هبط بهدوء للأسفل مر بجانب المطبخ كانت قدر تتحدث مع سناء قائلة : أنا ملاحظة يا سناء انك مش بتصلي
سناء : والله يا ست قدر انا واقفة على رجلى طول النهار يدوبك بلاحق على خدمة القصر الكبير دا
وقف يسترق السمع
تابعت سناء بحزن ادعيلي يا ست قدر ربنا يهديني
تنهدت قدر صمتت لحظة ثم قالت لسناء: عندي ليكي عرض
ردت باندهاش : عرض ايه يا ست قدر
_لو صليتي كل يوم الفروض كاملة هساعدك في شغل البيت موافقة ، كان هذا عرض قدر
ردت سناء بخجل : يا خبر يا ست قدر ، ودا برضو ينفع
قدر : وماينفعش ليه يا سناء انتي بس وافقي ، بصي هو الإنسان ممكن يكون بيقصر في حق ربنا ، ومش مثالي في أداء العبادات بس اهم حاجة يحاول حتى لو هيقع ويبعد بس ربنا هيقربك تاني للعبادة هاقولك حديث عن النبي ﷺ فيما يرويه عن ربه.
“قال: إذا تقرب العبد إليّ شبراً تقربت إليه ذراعاً، وإذا تقرب إليّ ذراعاً تقربت منه باعاً، وإذا أتاني يمشي أتيته هرولة ”
وضعت سناء يدها على وجنتها وقالت وهي تطلق تنهيدة راحة : كلامك حلو اوي يا ست قدر
قدر : يعني موافقة يا سناء انك هتبدأي تصلي
هزت سناء رأسها وقالت : اكيد يا ست قدر هحاول وربنا يقدرنا
كان مازال يسترق السمع بالخارج ارتسمت على وجهه ابتسامة وحك خلف رأسه بسعادة ، تلك الصغيرة الوديعة قلبها نقي رغم ظروفها .
حمحم وقال : سناء
ردت مسرعة : نعم يا رازي بيه
_القهوة بتاعتي ، كان هذا طلبه وهو يتوجه إلى الصالة الرياضية وتابع: قولي للانسة قدر تحصلني على الجيم
استقامت قدر واقفة ولحقت به
جلس وهو يطالعها بنظرات راضية لأول مرة بدأت تدلك يده بلطف فهي مازالت تخجل من قربها هذا فهو ليس كأي مريض إنما هو غريب أجبرت على العيش معه تحت سقف واحد
صمت تام حتى قطعه هو بقوله : مش عارف ايه الحنية اللي بتدلكي بيها دي
اردفت مسرعة : لا أنا بدلك حسب الإرشادات يا سيد رازي
