ندبات القدر الجزء الثاني
تجمعت الدموع في عينيها وقالت بنبرة حانية : بس انا اعرفك عز المعرفة يا فاطمة ، و اللي يسأل ما يتوهش يا حبيبتي ، ايه رأيك لو تيجي تقضي معايا كام يوم قبل ما اسافر تاني ، انا عايشة برا مصر
طالعتها بشك بدا جليا على ملامحها وقالت : أنا آسفة بس انا ماتعودتش اني اروح ما حد ما اعرفهوش ، وكمان انا عارفة ان بابا مستحيل يوافق على حاجة زي دي ، وغير كده هاكون صريحة معاكي انا مش مقتنعة بكلامك بالمرة
ابتلعت خصة مريرة وتجمعت الدموع في عينيها جاهدت بألا تظهر لكنها دست يدها في حقيبتها أخرجت منها رزمة نقود
وقالت : اتمني ما تكسفيش ايدي خلي الفلوس دي معاكي واعتبريها بديل للهدية ، كان المفروض اجيبلك هدية معايا بس ماكنتش متوقعة أني هاشوفك انهاردة بالذات
شردت قليلا تفكر كيف كانت تراقبها كل يوم منذ شهر تقريبا لكنها لم تستطيع مواجهتها ..
فاقت على صوت فاطمة المعترض : شكرا بجد بس انا مش هاقدر اخد الفلوس دي منك لأني زي ما قولتلك انا مش مقتنعة بكلامك ، وكمان الحمد لله معايا فلوس وبشتغل وبابا مش مخليني محتاجة أي حاجة ، بالمناسبة لو عايزاني اصدقك ممكن تشرفينا في شقتنا المتواضعة اكيد تعرفي بابا
همست منال بندم شديد : عز المعرفة ، عبد الناصر كان شخص خلوق اوي
استقامت فاطمة تستأذن بأدب بعد ان نظرت في ساعة يدها
قائلة : أنا مضطرة اني امشي عشان البريك بتاعي انتهى
هبت منال واقفة وقالت : ممكن تسمحيلي اني احضنك
تعجبت فاطمة وعقدت حاجبيها وقالت بدهشة : ممكن .
اقتربت منها لمست وجنتيها ادخلتها في حضنها وداهمتها الدموع وهي تقول : سامحيني لأني بعدت عنك
ظلت معلقة بها مما دفع فاطمة للتملص منها قائلة : أنا لازم امشي اتأخرت بجد
قبل أن تخرج تواجهت اعينها مع خاصة الياس وقال بتعجب : مين الست دي ؟
رفعت كتفيها وقالت : ما اعرفش بتقول صاحبة ماما الله يرحمها
هز رأسه وقال : غريبة اللي يشوفها كده يقول انها مش مجرد صاحبة والدتك بس ،
فاطمة : تقصد ايه
الياس : ماقصدش حاجة بس فيها حاجة غريبة
كان يقصد تصرفات تلك السيدة المريبة لانهما كانتا تبدوان كأم وابنتها ..
__________________________________
دلفت ملك إلى الاسطبل تتطلع لكل ما فيه بإعجاب وكأنه متحف لأشياء ثمينة او معرض لفنان مرهف الحس لكنها كانت تفكر في شئ ما يعجبها اكثر من الاسطبل الا وهو الجناح الغربي فهي تنبهر بكل ما فيه من أشياء تخص رازي وحده وهي تعلم أنه لن يوافق اذا عرضت عليه الذهاب إلى هناك لكنها تسللت دون أن يراها احد..
