متاهة مشاعر الجزء الرابع

ابتسم يزيد بتوتر:

ـ بص يا حسن.. أنت قعدت تقولها مراتي.. وبحب مراتي.. طبعاً جننتها وحطيتها قدام تحدي.. كأنك.. يعني..

قاطعه حسن بفظاظة:

ـ أيوه.. كأني رميت قماشة حمرا في وش تور..

ابتلع يزيد لعابه بضيق:

ـ يعني.. تقريباً..

هتف حسن بحنق:

ـ والمطلوب؟.. أخلي الــ ***** تغور من وشي إزاي؟؟؟…

تغاضى يزيد عن سوء ألفاظ حسن وهو يسأله بتوسل:

ـ أحل لك مشكلتك وتساعدني مع علياء.. عايزها ترجع تكلمني تاني.. هيه.. موافق؟..

ضرب حسن كف بكف وهو يصيح:

ـ يحرق دي صحوبية يا أخي.. يعني لو ما ساعدتكش.. هتسيبني أغرق مع الست اشتعال دي!!..

ـ خلاص يا حسن.. اهدا يا أخي..

كان مازن صامتاً بغضب وهو يستمع للحوار.. يريد أن ينهض ليمسك بتلابيب هذا الحسن ويسأله”من أنت؟.. وأين أخفيت شقيقي؟؟”.. ولكنه حاول السيطرة على أعصابه بقوة فولاذية وهو يتذكر محاولاته الحثيثة مع والده ليفك الحصار قليلاً حول حسن.. محاولات يشعر أنها على وشك النجاح بها.. ولكنه يحتاج إلى القليل من الوقت بعد..

سمع يزيد ينصح حسن بهدوء:

ـ بص يا حسن.. هي بس حست أنك مميز شوية عن اللي حواليك وده جذب واحدة من نوعيتها.. يعني لو تقدر تحسسها أنك واحد عادي زي زمايلك يعني.. و..

صرخ مازن مقاطعاً:

ـ لاااااا.. أنت عايزه يتحول أكتر من كده!!..

انتفض حسن بغضب ليجذب مازن من قبه قميصه وهو يسأله بحرقة:

ـ قصدك إيه؟..

دفعه مازن بقوة ولكن حسن كان أكثر غضباً ليتزحزح.. والتمعت نظرة شرسة بعينيه مما دفع بيزيد ليتدخل على الفور بينهما ليبعدهما عن بعض وهو يهمس لمازن بغضب:

ـ لو مش عارف تتحكم في أعصابك.. روح.. لكن مش هسمح أن ترفع إيديك عليه.. فاهمني..

عاد مازن إلى مقعده بعنف.. بينما التفت يزيد إلى حسن مهدئاً:

ـ خلاص يا حسن خلينا في المهم.. زي ما قلت لك.. حاول تظهر قدامها كأي نقاش.. من زمايلك.. و..

قاطعه حسن بسخرية:

ـ هو ده الحل السحري بتاعك؟!..

هز يزيد رأسه نفياً وهو يلتقط هاتفه ليتصل بأحد أصدقائه.. وسرعان ما تعالت ضحكاته مع ذاك الصديق قبل أن يخبره بلهجة غامضة:

ـ عندي طلب صغير..

سكت قليلاً وأكمل:

ـ خدمة خاصة بنون النسوة أيوه.. تعرف ابتسام نيازي؟؟

قهقه يزيد بقوة:

ـ أنا قلت ما فيش غيرك هيحل المشكلة.. مدام ابتسام يا سيدي ناوية على واحد معرفة.. والراجل غلبان ما لوش غير مراته وبيته.. و..