متاهة مشاعر الجزء الأول نهى طلبة

ـ خلي دي معاك عشان الحاجات اللي هتشتريها..

ـ لا.. لا.. أنا معايا بتاعتي..

ضغطها في يدها:

ـ خليها معاكِ.. بس خودي بالك.. أقسم بالله يا علياء لو جبتِ فستان قصير.. ولا عريان لأكون جرك من شعرك على المزرعة قدام الناس كلها ومش هيهمني.. فاهمة؟..

رفرفت برموشها وهي مأخوذة بالعنف في صوته.. فكرر بتأكيد:

ـ فاهمة؟؟؟

أومأت موافقة.. وهي ترتجف من الغيظ.. فها هو يعود لإلقاء الأوامر عليها مرة أخرى.. ويترك الحبل على الغارب لخطيبته الحسناء…

تمتمت بغيظ:

ـ أنت مش هتبطل الشيزوفيرنيا دي؟..

لسوء حظها وصله همسها فصرخ بها:

ـ ايه!!.. بتقولي إيه؟.. شيزوفرينيا إيه!!.. أنتِ اتجننتِ!!

عادت خطوتين للخلف وهي ترتجف من الخوف فقد أغضبته بدون أن تقصد..

حاولت تفسير كلماتها:

ـ أيوه.. أنت بهدلتني على هدومي.. وبتسيب ريناد اللي هي خطيبتك تلبس زي ما هي عايزة.. و.. وده يبقى اسمه ايه؟؟

ـ ريناد مش بتلفت الأنظار زيك..

خرجت الكلمات منه بسرعة وبدون أن يفكر بها.. ورمقته هي بذهول لا تدري ماذا يقصد بكلماته.. أيتهمها بمحاولة جذب الأنظار؟.. أم.. يعتقد أن خطيبته أقل جاذبية منها؟..

ظلت ترمقه بذهول وتساؤل.. بينما تجمدت الكلمات على لسانه ولم يستطع إضافة أي كلمة لتوضيح ما تفوه به للتو.. فما كان منه إلا أن خرج كالعاصفة مغلقاً الباب خلفه بعنف جعلها ترتجف في مكانها..

أخرجها من جمودها رسالة على هاتفها.. فتحتها لتجدها من نيرة..

“أنا قدام الفيلا.. انزلي..”..

********

ما أن أخبرته سكرتيرته بوجود عم نصر بالخارج في انتظار الإذن له بالدخول حتى تحرك مازن من خلف مكتبه ليفتح الباب ويستقبل سائق والده بود وترحاب:

ـ اتفضل يا عم نصر.. هو أنت برضوه محتاج إذن يا راجل يا طيب..

التفت مازن إلى سكرتيرته:

ـ اتنين شاي لو سمحتِ يا مدام كريمة..

ثم اصطحب نصر ليجلسا معاً على أحد الأرائك بعيداً عن المكتب ورسميته..

ربت مازن على ركبة نصر قائلاً بود:

ـ إيه.. إيه أخبارك يا عم نصر.. وأخبار صحتك ايه؟..

أجاب نصر بهدوء:
ـ بخير الحمد لله يا مازن بيه.. نشكر ربنا..

ـ إيه بيه دي بقى!!.. ده أنا متربي على إيديك.. وأنت أول واحد علمني السواقة.. حتى كان عندي 8 سنين..

ضحك نصر وهو يخبره بسعادة:

ـ علمتك إيه يا بيه.. ده أنت ما شاء الله عليك.. كنت طالع بالعربية لوحدك.. أنا يا دوبك قلت لك على شوية حاجات بسيطة كده…