متاهة مشاعر الجزء الأول نهى طلبة

أجابتها علياء بألم:

ـ ما أنتِ عارفة يا نوني.. أنها مش ممكن تحبني.. دي حتى كل ما تشوفني تقولي إني بفكرها بـماما الله يرحمها.. وترص لي بقى القصيدة اللي أنتِ عارفاها.. خطافة الرجالة.. خرابة البيوت.. وكلام من ده.. عشان كده أنا بفضل أقضي معظم الوقت في المزرعة.. عند جدو.. أقصد يعني.. أبو عمو عصام.. ولولا كده.. كانت طردتني من زمان.. وخاصة أنها واخدة بالها إني.. إني..

قاطعتها نيرة:

ـ إنك بتحبي المحروس ابنها.. البشمهندس يزيد بيه الغمراوي..

ـ أنت بتتريقي عليا يا نيرة؟

تأبطت نيرة ذراعها وهي تخبرها بمداهنة:

ـ لا يا حبي.. مش بتريق ولا حاجة.. هي صحيح قصة حبك دي ملعبكة.. يعني موقفك صعب شويتين.. هي مش ممكن هتنسى أنك تبقي بنت الست اللي اتجوزت جوزها.. بعد عشرة 20سنة.. موقف صعب مش سهل..

تنهدت علياء بيأس:

ـ أنت ناسية أهم حاجة.. أنه مش معبرني نهائي.. ولا كأني موجودة.. وأما بيجي يكلمني بيكون كل كلامه مجموعة من المحاضرات على اللي يصح واللي ما يصحش.. ويكملها بشوية تعليمات ونصايح.. وغير ده كله.. خطيبته الآنسة المبجلة.. ريناد.. بنت خالته.. ده بيموت عليها يا نوني.. وأنا..

كادت أن تختنق بغصتها.. فسكتت قليلاً ثم أكملت:

ـ وأنا.. انا بموت كل ما اشوفه معاها.. وهي حاطة ايدها في ايده كأنها بتقولي ده بتاعي.. وعمره ما هيبصلك أبداً..

قربت نيرة رأسها من علياء وهي تسألها باهتمام:

ـ أنت بتعملي زي ما بقولك ولا لأ؟..

ترددت علياء:

ـ ما هو أصل..

صاحت بها نيرة بغضب:

ـ اصل إيه وفصل إيه!!.. اسمعي كلامي أحسن لك لو عايزة سي يزيد بتاعك ده يبص لك.. وإلا هتلاقي نفسك بتحضري فرحه زي ما حضرتِ خطوبته ودمعتك على خدك..

ـ يا نيرة.. صعب.. صعب علي قوي أني أقرب منه أو إني.. إني..

رفعت نيرة احد حاجبيها وهي تسألها:

ـ أنك تغويه؟.. لا يا عليا مش صعب.. خليكي بس لازقة فيه في كل حتة.. لاحقيه.. خليكي قدام عينيه على طول.. وفي اللحظة المناسبة اضربي ضربتك.. ومش هوصيكي على اللبس والميك آب وكده..

هزت علياء رأسها بخوف:

ـ خايفة يا نوني.. خايفة..

ـ أنتِ بس خايفة عشان أنتِ لسه صغيرة.. أكبر منك بيوم يعرف عنك بسنة.. وأنا أكبر منك بتلات سنين.. يعني أعرف حاجات وحاجات.. خليكي بس معايا وأنت تكسبي..

ـ أيوه يا نوني.. بس هو بيحب ريناد.. معقولة أني أقدر.. يعني أقدر أقرب منه وهو..