متاهة مشاعر الجزء الأول نهى طلبة

نهض نصر من فوق الأريكة فتبعه مازن بدوره وهو يتأمل وجه الرجل الأكبر سناً محاولاً معرفة ما يدور بداخله… لكن صوت نصر قطع تأمله وهو يردد:

ـ هو عرض مغري قوي يا مازن بيه.. بس!!!..

قاطعه مازن بسرعة:

ـ آه نسيت أقولك.. أن الكلام ده كله هيتكتب به عقد.. عشان نحفظ حقك يا راجل يا طيب.. وأنا همضي كمان كضامن للتنفيذ.. وكل الأمور المالية هتكون معايا.. لأنه زي ما قلت لك.. الراجل صاحب التاكسي هيكون مسافر..

أومأ نصر متفهماً ومد يده ليصافح مازن:

ـ أنا ما كانش قصدي يا بيه.. عقد إيه بس.. أنت كلمتك عقد.. أنا بس محتاج أشاور أم العيال.. وهرد عليك الليلة بأمر الله..

صافحه مازن بدوره وهو يخبره:

ـ هستنى تليفون منك يا عم نصر.. وياريت يكون الرد بالموافقة.. دي جميلة مش هنسهالك..

ربت نصر على كتف مازن وقد أدرك لباقة مازن حتى لا يبدو وكأنه يقدم له العرض كنوع من الاحسان أو الشفقة وأخذ يدعو له:

ـ ربنا يكرمك يا بني.. ربنا يكرمك وينولك اللي في بالك..

ثم خرج مغلقاً الباب خلفه ولسان حال مازن يردد..

“آمين”…

*************

انطلقت نيرة بسرعة جنونية فور أن دلفت علياء داخل السيارة.. مما دفع علياء إلى الصراخ:

ـ نيرة.. نيرة.. هدي السرعة شوية..

زادت نيرة من سرعة السيارة بينما سارعت علياء إلى وضع حزام الأمان وتشبثت بمقعدها بيأس.. وهي تحاول تهدئة نيرة التي كان الغضب يدور حولها مثل هالة مرئية:

ـ نيرة.. اهدي بس.. وقفي على جنب خلينا نتفاهم..

استمرت نيرة في سرعتها بدون أن تجيب على صديقتها حتى وصلت إلى منطقة وسط البلد.. فهدأت سرعتها قليلاً بفعل الزحام.. وأجابت علياء والغضب يلون نبرات صوتها:

ـ لسه بيشوفها يا عليا.. لسه بيقابلها..

ـ هو مين ده؟؟

صرخت نيرة بغضب:

ـ حسن يا عليا.. هيكون مين يعني؟..

ـ وأنتِ عرفتِ منين؟

ضغطت نيرة على اسنانها:

ـ شوفتهم بنفسي.. كنت هتجنن يا عليا.. حسيت إني مشلولة من القهر.. بقى يسبني أنا بسرعة ويجري جري عشان يقابلها..

ـ هدي نفسك بس يا نيرة.. يمكن كان بينهي اللي بينهم.. أو..

صرخت نيرة:

ـ بينهي اللي بينهم!!..إيه السذاجة اللي أنتِ فيها دي أنتِ كمان..

ـ أومال إيه بس يا نيرة؟.. أنتِ مش بتقولي إنكوا كويسين مع بعض..

أوقفت نيرة السيارة على جانب الطريق وهي تضرب بيدها مقود السيارة بعنف: