متاهة مشاعر الجزء الأول نهى طلبة

ـ أنا كنت فاهمة أنه هينساها.. هو بقى له أسبوع ما شفهاش.. أنا متأكدة.. لكن.. لا.. برضوه الصعلوكة دي لسه بتجري وراه.. وعارفة إزاي تجيبه لعندها على ملا وشه

تجنبت علياء سؤال صديقتها من أين لها تلك المعرفة.. فهي أدركت من زمن أن لنيرة وسائلها للوصول إلى ما تريده من معلومات..

التفتت نيرة لتفتح حقيبتها ويدها ترتعش من الغضب.. فأخرجت قداحة ذهبية صغيرة.. أشعلت بها إحدى السجائر التي سحبتها من علبة ذهبية مماثلة.. وظهر على وجهها التفكير العميق وهي تنفث دخان سيجارتها بغيظ..

أخذت تدق بطرف سيجارتها على العلبة بغيظ.. وهي تفرك شفتيها بين أسنانها.. ثم برقت عينيها بشدة وهي تنظر إلى العلبة الذهبية وتهمس بشماتة:

ـ ماشي يا منى.. أنا بقى عرفت إزاي اخليكي تبعدي عن حسن.. وما تفكريش تقربي منه تاني..

رمقتها علياء بقلق:

ـ ناوية على إيه يا نيرة؟..

هزت نيرة كتفيها بلامبالاة وهي تسأل علياء:

ـ أنتِ عارفة منى بتشتغل فين؟..

أومأت علياء موافقة:

ـ ايوه في محل فساتين سواريه في مول…

قاطعتها نيرة وعينيها تبرقان بخبث:

ـ طيب يلا بينا.. أنتِ أكيد محتاجة فستان عشان حفلة الليلة..

وانطلقت بسيارتها وهي تضحك بسخرية وشماتة مما تنوي فعله…

**************

دخل عامر إلى غرفة صبا ابنته الصغرى فوجدها تمسك بالهاتف وعينيها الجميلتين تلتمع بالدموع.. جلس بجانبها بهدوء وهو يملس شعرها الكستنائي المموج قليلاً.. وسألها بهدوء:

ـ كلمتِ فريدة؟..

أومأت برأسها في موافقة صامتة.. وظهر الحزن على ملامحها.. فضمها والدها إلى صدره وهو يخبرها:

ـ أنتِ عارفة إني مش همنعك أنك تروحي تعيشي معاها.. إحنا.. أنا وفريدة عمرنا ما اختلفنا على مصلحتك.. أو عارضنا في إنك تعملي اللي أنتِ عايزاه..

أومأت صبا مرة ثانية وهي تهمس لوالدها:

ـ أنا اخترت إني أكون هنا معاك يا بابا.. وأنا مقتنعة بكده.. وأن ده أفضل لي ولـــفريدة..

أبعدت رأسها قليلاً عن صدره وهي تمسح دموعها بظاهر يدها:

ـ حضرتك عارف أن فريدة صعب عليها تراعيني.. وهي بترسم.. وخاصة لو بتجهز لمعرض زي اليومين دول.. وأنا كمان مش بحب الحياة في باريس..

افتعل عامر ضحكة صغيرة وهو يخبرها:

ـ ما بتحبيش الحياة في باريس!!.. ما سمعتكيش نيرة.. كانت وقعت من طولها..

ضحكت صبا هي الأخرى.. ثم سكتت قليلاً.. وأخبرته بخفوت: