في هواها متيم الجزء الثاني سماح نجيب
قطبت رهف حاجبيها قائلة :
:” أنهى دكتور ده اللى رخم تقصدى مين إحنا دخلنا ٣ دكاترة”
قالت ليان وهى ترفع شفتها العليا بإستياء :
–:” أول دكتور دخلنا المدرج اللى اسمه رفيق ده”
–:” دا رخم ! دا سكر محلى محطوط على كريمة يا حلاوة نظارته ”
قالتها رهف بإعجاب أختلط بمزاحها كالعادة
فأبدت ليان إمتعاضها من قولها وهى تقول :
–:” على خيبة ايه دا شكله فطران غرور وتكبر وعجرفة قبل ما يدخلنا”
مطت رهف شفتيها وقالت بوداعة :
– :” لاء والله دا فطر مربى وجبنة وشرب قهوة”
رفعت ليان حاجبيها قائلة :
– :” ليه أنتى كنتى بتفطرى معاه هو أنتى تعرفيه”
فكرت رهف إنها لو أخبرت ليان بأن رفيق شقيقها ، فربما سترفض صداقتها ، لذلك قررت عدم إخبارها بتلك الحقيقة ، فهى تريد تكوين صداقات طبيعية ، ليس من أجل أن شقيقها محاضراً بالجامعة ، فهى ستتعامل معها كأى طالبة حتى لا تتجنبها ليان ، وخاصة أنها هى أيضا أحبت رفقتها ، فهى تشبهها فى بعض النواحى وهى حب المزاح والمرح
حكت رهف جبهتها وهى تقول بتوتر :
–:” أنا بس بخمن ماهو ده الفطار اللى الناس بتفطره”
قالت ليان بإعجاب :
–:” بس تصدقى شرحه حلو ويدخل الدماغ على طول”
قالت رهف بحب وإعجاب شديد :
–:” فعلاً شرحه سهل وبسيط ومريح كده للاعصاب انا كنت هنام من حلاوة صوته”
وكزتها ليان بلطف وقالت :
ليان:” ما تروحى تطلبى منه يغنيلك بالمرة”
ضحكت رهف وقالت :
–:” تفتكرى يعملها ولا مش هيرضى يغنيلى”
قالت ليان بشئ من الضيق :
–:” على فكرة أنتى عمالة تتغزلى فيه وكده حرام عليكى يارهف وأنا مش بحب البنات اللى بتقعد تتغزل فى راجل كده حرام لازم نغض البصر ”
تبسمت لها رهف قائلة بوداعة:
–:” حاضر مش هعمل كده تانى بس أنا والله مش من النوع ده”
ربتت ليان على كتفها وقالت :
–:” انا علشان ارتاحتلك قولتلك كده علشان صداقتنا تدوم إن شاء الله باين عليكى طيبة أوى وأنا بجد ارتاحتلك ومبسوطة إن اتعرفت عليكى”
أتسعت إبتسامة رهف وهى تقول :
:” ان شاء الله يا ليان وأنا كمان والله أرتحتلك ، وفرحانة أن هيبقى ليا صديقة من أول يوم فى الكلية ، وكمان محترمة ”
أُعجبت رهف بتفكير ليان وحسن خلقها ، فيبدو عليها أنها فتاة طيبة ذات اخلاق حسنة ، فتمنت حقاً أن تكون تلك الفتاة هى صديقتها المقربة ، فرهف حتى الآن ، لم يكن لها صديقة بالمعنى الفعلي
_______________
فتح فاروق عيناه ببطئ ، وضع يده على فمه متثائباً بصوت عالى نسبياً ، نظر بجواره فوجد تلك المرأة مستلقية على وجهها ، ينسدل شعرها على وجهها يخفى معالمه ، فطافت عيناه بأرجاء الغرفة ، فوجد كل شئ مبعثراً خاصة زجاجات الخمر ، وضع رأسه بين يديه ، وضغط على جانبيها ، يشعر بصداع يكاد يفتك بها
