في هواها متيم الجزء الثاني سماح نجيب
تبسم رفيق بسخرية وهو يقول :
–:” أنسى ! أنسى ازاى يا أكمل أنسى كسرة نفسى ولا كسرة قلبى ولا الفضيحة اللى حصلت يومها واللى محدش يعرف عنها حاجة غيرك أنت حتى اهلى ما يعرفوش ”
رمقه أكمل بشفقة وقال :
–:” أنا مقدر ظروفك يا رفيق بس حاول تنسى أنت مش هتفضل عمرك كده يعنى ”
خرجت زفراته حارة وهو يقول بأسى :
–:” أنسى لما البنت اللى حبيتها قالتلى فى وسط الكلية كلها و قدام الطلبة وهيئة التدريس ، أنت تبقى مين وإبن مين ، تطلع ايه أنت علشان تحبنى وتحلم بيا أنت ناسى أنا بنت مين بص على قدك يا تربية الورش والحوارى ، كلامها وجعنى وكسرنى ، لما أفضل أربع سنين أحبها وأرسم أحلام وأصحى على كابوس”
قال أكمل بإستياء عارم :
–:” هى كانت قليلة الذوق واستغلالية استغلتك علشان كنت المعيد ومعجب بيها وكمان كنت بتذاكر لها ، أخدتك سكة علشان تنجح ”
شد رفيق على يديه قائلاً :
–:” أه فضلت معشمانى بوهم ولما أتخرجت واجهتنى بالحقيقة أنا أبقى فين وهى فين وإن أنا الشاب الفقير اللى مش لازم يحلم ببنت الأكابر”
ترك أكمل مقعده وأقترب منه يربت على كتفه بمواساة :
–:” الحكاية دى فات عليها سنين حاول تنسى بقى يا رفيق”
خرجت نهدة حارة منه وهو يقول :
– :” مش عارف أنسى أو بمعنى أصح كل ما أنسى دى تفكرنى بأصلى وتفكرنى بمعايرتها ليا وسط الناس كلها”
أشار بيده الى تلك الندبة بوجهه ، وهو يبتسم بسخرية على حاله ، ولكنه يشعر كأن قلبه ينزف بقوة ، حتى يكاد ان يبلغ أنفاسه الأخيرة ، فتلك الندوب بقلبه رافضة أن تندمل أو أن تتركه يكمل حياته كباقى البشر ، فهو كأنه بدائرة مغلقة ولا يعرف السبيل إلى الخروج منها
–:” ما انت اللى رافض تعمل عملية تجميل بس والله هى مش مأثرة فى وشك ولا حاجة ”
قال أكمل عبارته وعاد يجلس على مقعده ثانية
فنهض رفيق من مكانه قائلاً :
–:” سيبك من الكلام ده دلوقتى عملت ايه فى العرض درسته ولا لسه”
أماء أكمل برأسه قائلاً:
– :” أيوة وحتى طلبت من مالك يعمل دراسة جدوى للمشروع وان شاء الله خير”
–:” ان شاء الله أنا رايح مكتبى لو فى حاجة بلغنى بيها”
عندما هم بالخروج من غرفة مكتب “أكمل” متجه الى غرفة مكتبه ، فاليوم برمته كان مرهق للغاية ، فأعصابه لم تعد تحتمل التظاهر بالبرودة واللامبالاة اكثر من ذلك ، فهو يريد الاختلاء بنفسه قليلا ، حتى يستطيع أن يعيد الى نفسه الهدوء الذى اعتاد الجميع ان يراه به
