الفصل التاسع عشر لولا الغرام بقلمي روز آمين
أجابه ممتنًا:
-أنا تمام والحمد لله، طمني عليك أنت؟
قال بجدية:
-بخير يا حبيبي، بنوتك عاملة إيه؟
امتعضت ملامحه تمثيلاً وقال باستنكار مرح:
-إيه بنوتك اللي طالع لي فيها دي كمان؟ اسمها دليلة يا ابني
رد مستنكراً بهمس حمل غيرة خفية:
-بطلوا تلزيق بقى أنت وبنتك، قال دليلة قال.
وقال بذات مغزى:
– هي دليلة واحدة مفيش غيرها.
تعالت ضحكات علي وهو يسترجع في مخيلته كيف كان أشرف معترضاً بشدة على تسمية الصغيرة بهذا الاسم وقت ولادتها، متحججاً حينها بأن عليهم اختيار اسم جديد يواكب الموضة، لكن الحقيقة هي أن أشرف كان يغار على اسم حبيبته، ولا يريد لأحد أن يشاركه فيه.
تابع كلماته بسرعة ليغير مجرى الحديث قبل أن تغلبه مشاعره وتفضحه:
-بقول لك إيه قبل الكلام ما يسرقنا، محمد ابن عمتك نازل مصر الأسبوع ده، وأنا بعت للبنوتة معاه حلق وخاتم، هديتها من عمها.
وقبل أن يسترسل في حديثه، قاطعه علي بنبرة لائمة:
-يا ابني ما أنت حولت لها مبلغ كبير وقت ولادتها، كفاية كده يا حبيبي.
أجابه بحب صادق غلف نبراته:
-وماله؟ دي حبيبة عمها ولازم تتدلل وتتدلع.
رد علي بامتنان:
-ربنا يخليك ليها يا عمو، وتعيش وتجيب يا سيدي.
شعر أشرف بنوع من الحرج، وتحمحم ليتغلب على ارتباكه، ثم تابع بصوت خافت:
-أنا بعت معاها هدية كمان، سلسلة لدليلة بمناسبة عيد ميلادها.
ظن علي للوهلة الأولى أنه ما زال يتحدث عن طفلته الرضيعة، فقال بدهشة:
-هو فين لسه عيد ميلادها يا أشرف؟ دي بالعافية كملت خمس شهور، وبعدين يا ابني ما أنت باعت لها خاتم وحلق اهو، ليه المصاريف دي كلها بس يا حبيبي؟
سرى تيار من الإحراج الشديد في أوصال أشرف، وتحمحم مجدداً ببطء ليجمع شتات نفسه، ثم قال موضحاً بنبرة حاول جاهدًا لتخرج جادة:
-أنا بتكلم عن دليلة صادق يا علي، بنت خالك.
صمت علي لثوانٍ، ودارت في عقله الأفكار قبل أن يتذكر فجأة أن خاله اتصل به بالأمس،و دعاه هو وداليا على حفل ذكرى ميلاد ابنته الذي يوافق الأسبوع المقبل.
هتف علي وقد استوعب الأمر:
-آه، ده فعلاً عيد ميلاد دليلة الأسبوع الجاي.
ثم تابع بنبرة يملؤها الاستغراب والشك:
-بس أنت عرفت منين؟
