فضية شرف الجزء الثاني

كوثر : طيب ساعدوها فى تنضيف الاوضه وظبطوها وبعدين حصلونى على المطبخ

فرحه : انا قولت غنى ورقص .. ميار قالت اكل وتنضيف .. اتكلى يا امى وميار هتحصلك

( يضحكوا عليها .. وتخرج كوثر تجهز الاكل وهما يفضلوا مع مى .. عند ليلى ترجع هى وامل البيت .. وهما داخلين العماره كانت هاجر بتمسح السلم ويوسف نازل والجزمه تطبع على الارض .. هاجر تشهق وتبصله )

هاجر بنرفزه : ايه دا .. ايه يا استاذ يوسف دا .. ضهرى اتكسر من التوطيه حرام عليكو

يوسف : سورى يا هاجر مخدتش بالى

( يكمل نزول وهى تبرطم بصوت واطى )

هاجر : عيله تجيب الاجل وتقصف العمر

( تمسح مكان رجله تانى .. يوسف يقابل ليلى وامل )

يوسف بابتسامه : مساء الخير

ليلى وامل : مساء النور

يوسف : جايين منين كده

ليلى : كنا ف الجامعه بنخلص شويه حاجات

يوسف : اممممم .. ( يوسف يبص لامل ويبتسم ) .. ازيك يا امل ؟

امل تبادله الابتسامه : كويسه الحمدلله

يوسف : دايما

( تبتسمله )

ليلى : رايح فين كده

يوسف : المرسم .. ف لوحه عاوز اخلصها وزى ما انتى شايفه احوال البيت بقي فمش عارف اركز

ليلى : اه ربنا يعينك

يوسف : يارب .. يلا باى

ليلى وامل : باى

( ليلى تاخد امل ويطلعوا .. يوسف يبص عليهم ويتابعهم وبعدين يفتكر ابتسامه امل يبتسم ويخرج من العماره .. ليلى وامل وهما طالعين رجلهم تطبع مكان ما هاجر لسه منضفه .. ترمى المساحه وتبصلهم )

هاجر بعصبيه : ميتين ام دى شغلانه بقي

( ليلى وامل يمسكوا نفسهم بالعافيه من الضحك على ريأكشن وشها )

ليلى : سورى يا هاجر منقصدش

هاجر بزعيق نوعا ما : ولا تقصدوا

( تمسك المساحه وتكمل تنضيف وهما يطلعوا وبيضحكوا على شكلها .. شويه وتنزل رحمه كانت هتجيب حاجات من الشارع وهاجر كانت لسه بتمسح .. رحمه كانت هتتزحلق بس تلحق نفسها والكوتش يفرك ف الارض جامد ويعملها طينه .. هاجر تبص مكان رجلها وتتنح )

رحمه : سورى يا جوجو مخدتش بالى

هاجر : لا يختى ولا يهمك

( تسيبها رحمه وتمشي .. هاجر تمسك جردل الميه وتدلقه ف الارض كله وترمى المساحه وفوطه التنضيف )

هاجر : انا غلطانه انى بنضف لعيله معفنه زيكو .. كتكو نيله ناس تجيب الهم .. والله ما انا عملالكوا حاجه يا عيله غجر

( حسين يخرج ويلاقى الميه مغرقه الارض وهاجر واقفه مبتعملش حاجه )

حسين بزعيق : ايه يا وليه الارض دى .. ما تخلصي .. عملالى حوار ع حبه سلالم