فضية شرف الجزء الثاني
ليلى : تمام
ادم : انتى عارفه انى متجوز اتمنى دا ميعملش حساسيه ف…………
تقاطعه ليلى : الموضوع مش فارق ومش حطاه فدماغى اصلا
ادم : تمام
( يسكت شويه .. وهى للحظه تستغبى كلامها .. تحاول تقطع الصمت اللى ساد لدقايق )
ليلى : احنا وضعنا ايه دلوقتى ؟
ادم : من ناحيه !؟
ليلى : يعنى عموما
ادم : متجوزين
تضحك بتلقائيه : بجد ! .. تصدق مخدتش بالى
( يبتسم ويبصلها )
ادم بابتسامه : قصدى انى بقيت مسئول عنك خلاص
ليلى : اوكى دا معروف .. بس هتسافر يعنى ؟
ادم : بعد شهر .. بصي وضعنا عموما قدام الناس متجوزين ومبسوطين كمان .. لوحدنا هعتبرك زى رحمه بالظبط .. انا من زمان شايفك كده اصلا بس الظروف
ليلى : امممم تمام
ادم بحذر : وبالنسبه لسيلفيا بلاش نبان قدامها مع بعض .. عشان مشاعرها بس
( ليلى اضايقت انه خايف على مشاعر سيلفيا لدرجه انه يطلب منها حاجه زى دى .. كانت لسه هترد عليه يقاطعهم خبط الباب .. يقوم ادم يفتح يلاقيها نشوى ومعاها سيلفيا .. يستغرب ويبصلهم باستفسار )
نشوى : انا مليش دعوه هى اللى عماله تزن وعاوزه تطلعلك
( ادم يبص لسيلفيا ويتكلم بالالمانى )
ادم : فى ايه ؟
( سيلفيا تدخل وتحضنه .. نشوى تبصلها بقرف وتنزل وليلى تتحرج جدا )
سيلفيا : وحشتنى اوى
ادم : انا لسه كنت معاكى تحت والمفروض اننا اتفقنا ان انهارده هتباتى لوحدك وبكره هطلعك
سيلفيا بابتسامه : مقدرتش
( لسه بتضمه اكتر ادم يشيل ايدها وينزلها )
ادم : بطلى اللى بتعمليه دا
سيلفيا تكشر : هو ايه اللى ابطل ؟ .. شوف اول يوم وبقيت تقولى ابطل اومال لو قعدت معاها شويه هتعمل ايه فيا بقي !
ادم : سيلفيا مش وقته الكلام دا .. انزلى يلا
سيلفيا : مش نازله وهقضي معاك اليوم انهارده
ادم : انا مش هكرر كلامى مرتين
سيلفيا : انا مش فاهمه انت عاوز تنزلنى ليه ؟؟ .. هتفضلها عنى !؟
ادم : بدأنا بقي
سيلفيا : لا لسه مبدأناش .. انهارده بتاعى وهتنام فى حضنى انا تمام ؟
ادم : لا مش تمام .. واتفضلى انزلى
( سيلفيا تقفل الباب وتدخل جوه الشقه )
سيلفيا : انا قولت لا .. انا هستناك فى الاوضه خلصوا كلام وحصلنى
( تسيبه وتدخل اوضه النوم اللى المفروض تكون اوضه ليلى اصلا .. ليلى كل دا متابعهم فى صمت لانها فاهمه كل كلمه قالوها .. هى بتفهم المانى كويس جدا وكمان بتعرف تتكلمه .. تبص لادم بهدوء ومستنيه تشوف رده فعله .. ادم يقرب عليها ويمسكها من ايدها وياخدها الاوضه الصغيره .. يقفل الباب وراهم ويبصلها )
