نفوس قاسية الجزء السادس
جذبت سهر عمران من يده وقالت وهي تبعده عن طريق آدم المحدق به بغضب:
– أنا عاوزة أفهم أنت إزاي تاخد قرار زي دا من غير ما ترجع لوالدك الأول وتفاتحه فيه ويروح معاك يطلب لك اللي أنت عايزها، وأنت عارف كويس أن والدك استحالة يرفض لك طلب، طالما دا اختيارك أزاي تصغر بينا بالشكل دا يا عمران.
حدق عمران بوجه والدته ورفع يده وتلمس وجهها بحب وتغافل عن تنفس والده الحاد وغيرته الواضحة على والدته وقال:
– الموضوع كله جه بسرعة أنا كنت قاعد مع ريهام وأختها ووالدها شافوني سلموا عليا، فلاقيت نفسي بطلبها هي أصلًا زميلتي وأخلاقها كويسة جدًا يا أمي وصدقيني هتحبوها، وبعدين محصلش حاجة لكل الثورة اللي بابا عاملها، أنا مش رايح اتجوز بكرة يعني دي قرايه فاتحة وخطوبة ودبلتين.
جلس آدم بعدما شعر بنفاذ صبره وقال بغضب:
– مهما كان حضرتك كان مفروض تعرفني الأول علشان أقدر أمهد للكل، إنما سيادتك بلغت أخوك وآدم ابن عمك الأول، أنت عارف شكلي كان أزاي ومازن بيلغني وبيقولي مبروك خطوبة عمران أزاي مفكرتش فالأصول يا ابن الأصول.
همست سهر بصوت خفيض لعمران وقالت:
– بابا معاه حق أزاي عمك مازن اللي يبلغه وأزاي رشدي يعرف قبل والدك اتفضل حاول تصلح مع والدك.
توجه عمران ناحية آدم ووقف أمامه وقال:
– أنا مكنش قصدي أي حاجة يا بابا دا كان كلام شباب مع بعض، مكنتش أعرف أن آدم هيروح يقول قبل ما أقعد مع حضرتك الأول، وعمومًا القرار الأول والأخير ليك أنا بردوا ابنك ومش هخرج عن طوعك.
ربتت سهر على كتفه ونظرت لآدم ولكنها عبست حين شعرت بارتجاف عمران فحدقت بوجهه وقالت تسأله بقلق:
– مالك يا عمران أنت تعبان ولا أيه.
لاحظ آدم وجه عمران والعرق الذي يغطى جبينه، فوقف وحدق به ووضع يده على جبهته وقال:
– دا حرارته عاليه يا سهر و.
ابتعد عمران عن والده وقال بارتباك:
– دا شوية برد يا بابا أنا بخير وهطلع دلوقتي اريح متقلقش ماما على الفاضي المهم أنك تسامحني و.
ومريام ذنبها أيه يا عمران.
التفت الجميع لجنة بعدما سألت شقيقها ووقفت أمامه وعيناها دامعة وأعادت حديثها وقالت:
– مريام ذنبها أيه يا عمران ما تجاوبني.
ازدرد عمران غصته وقال:
– ملهاش ذنب احنا أصلًا مكناش لبعض يا جنة، وموضوع مريام مكنش له أي أساس.
صاحت جنة ببكاء تقول:
– مكنش له أساس أزاي واعترافك ليها بالحب وكل اللي بينكم مالوش أي اعتبار عندك، أنا مش عارفة أزاي بتقبلوا على نفسكوا تحبوا وتعشموا الواحدة بالحب وتبقوا انتم محور الكون، وفالأخر بكل ندالة تقولوا أصل مكنش في موضوع بينا اصلًا، أنت أزاي معندكش قلب بالشكل دا وأزاي أصلًا بابا ولا ماما مرفضوش طلبك وهما عارفين ومتأكدينأانه هيكسر قلب ماري.
