نفوس قاسية الجزء السادس
ولج رشدي إلى غرفة والدته وجلس أرضًا أسفل قدميها وقال:
– مالك يا ماما مين زعلك يا قلبي.
ربتت سهر على رأس رشدي وقالت:
– مافيش يا قلب ماما.
قبل رشدي يد والدته وقال وهو ينظر لها:
– أنا سمعت المناقشة اللي دارت بينكم وعارف أنك زعلانة علشان اللي حصل مع جنة، بس بلاش تنكري أن جنة النهاردة تخطت كل الحدود معاكِ ومع بابا، ونقول الحمد لله أن عمران مش هنا وألا كان ولع فيها على كل حرف قالته.
نظرت سهر إلى ابنها وقالت:
– هو أنت طالع طيب أوي كده لمين يا رشدي وماخدتش من والدك حاجة.
وقف رشدي وقال بسعادة وفخر:
– أنا طالع ليكِ أنتِ واخد قلبك كله.
صمت رشدي فجأة ونظر حوله وقال بهمس وهو يقبل جبهة والدته:
– وبحبك أوي علشان كده أنا أقرب واحد ليكِ والمنافسة بتاعتي جنة.
انتفض رشدي حين سمع صوت صارم يقول:
– سمعتك يا سي زفت وبعدين أنا مش قايلك مليون مرة الاوضة دي متدخلهاش أبدًا.
أبتعد رشدى عن والدته بسرعة ونظر خلفه فلمح أخيه عمران فقال ينهره:
– هو أنت يا عمران يا شيخ سيبت مفاصلى أنا مش قايلك متقلدش صوت بابا معايا وانا هنا.
ضحكت سهر رغم إحساسها بالحزن على مشاكسة عمران لرشدي، لينتفض الاثنان سويًا حينما شاهدا آدم يقف أمام باب غرفته وهو يعقد يداه أمام صدره ويستند عليه بكتفه ويحدق بهما بغضب، فازدرد رشدي لعابه وهو يخفي توتره أمام والداه ووقف عمران بتحدي أمامه لينحني ويقبل يد والدته فهمس رشدي وقال:
– والله شكلك هتبقى الضحية المرة دي يا عمران.
تقدم آدم مسرعًا باتجاه عمران ليجذبه من ملابسه وهو يصيح بغضب هادر رج أرجاء المنزل بأكمله:
– أنا لما بدي أمر الكل بيلتزم بيه وأنت يا عمران بتتحداني، أنا قلت مليون مرة دلع واحضان وبوس مع سهر لا انتو كبرتوا خلاص على لعب العيال دا، اتفضل أنت وهو كل واحد فيكم على اوضته وحذاري ألمح خيال واحد فيكم هنا تاني.
تسبب صياح آدم الغاضب في استيقاظ جنة فانتفضت تبكي وتحركت باتجاه الباب تحاول فتحه، فطرقت عليه بهستريا وقد انطلقت صرخاتها هي الأخرى تصم الأذان، فاندفعت سهر باتجاه غرفتها وحاولت أن تفتح لها وهي تطمئنها:
– هفتح لك يا قلب ماما أهدي بس أهدي يا جنة علشان خاطري.
ازدادت صرخات جنة وبكاؤها وقالت بصوت مرتعد:
– افتحى لي ياماما أرجوكِ أنا بتخنق هنا وحياتي يا ماما افتحي لي وأنا هسمع كلامك.
