لن استسلم الجزء الأول سارة سعد
*كان قلبه يخفق بعنف وصدره يلهث بالغضب أغمض عينيه للحظات يمط شفتيه بابتسامة مزيفة عرفت طريقها إلى شفتيه:
“استحالة أنساها يا داده”
*صمت للحظة ثم أكمل بسخرية لم تلاحظها كريمة:
“إسراء متتنساش بسهولة ليها ذكريات كتير وكلها معلمة في قلبي”
*تمتمت كريمة بحزن تقول بتأثر:
“الله يرحمها كانت بتحبك أوي”
*ابتسامة قاسية ارتسمت فوق شفتيه وهو يرد بهدوء:
“فعلا كانت بتحبنى كدة ومخلصة ليا إخلاص مالوش حدود”
*أخذ نفسا عميقا قبل أن يهتف:
“بكرا إن شاء الله في ضيوف هيتعشوا معايا تحبي أجيب حد يساعدك؟”
*هزت كريمة رأسها نفيا:
“حد إيه أنا قدها وقدود…وكمان في بنت جاية تساعدني في تنظيف الفيلا متقلقش”
*ربت على كتفها الحنون:
“مش قلقان يا داده ربنا ما يحرمني منك أبدا”
*قبلت كريمة رأسه وهي تغمغم بحب:
“أنت ابني ونور عيني ونفسي أشوفك مبسوط يا حبيبي ربنا يكرمك ببنت الحلال”
*تنحنح يجلي صوته المحشور:
“إن شاء الله يا داده بس مش دلوقتي أوعدك هافكر وأختار واحدة مناسبة أقدر أكمل معاها حياتي إلا جاية:
*ابتسمت كريمة تملس فوق وجه نضال بحنان:
“ربنا يريح قلبك يارب وتلاقي بنت الحلال,يلا العشا جاهز”
*هتف نضال وهو يتناول طعام عشائه:
“آه على فكرة يا دادة في أصحاب ليا عزموا نفسهم على العشاء هنا ف ياستي عايزك تعملي سفرة حلوة كدة وياريت أسماك…عارفين أنك إسكندرانية بقا”
*ضحكت كريمة بسعادة وهي تضع قطعة من اللحم أمام نضال ليرفع كفه باعتراض:
“خلاص يا كريمة حرام عليكي”
*غمغمت كريمة باعتراض :
“خلاص إيه أنت بتشتغل طول النهار وكفاية السجاير إلا بقيت تشربها حرام عليك نفسك يابني كل وأتغذى،أما العشا بقا ولا تحمل هم هيكون أحلى عشا أسماك عيوني عشانك وعشان البهوات صحابك”
******************************
*وقفت شجن بجانب باب المصنع الخلفي مترددة تفكر في الإتصال بالمعلم سلطان فهو منقذها الوحيد الآن ولا سبيل آخر أمامها غيره فقد أغلقت جميع الأبواب في وجهها وهي الآن في أمس الحاجة إلى شخص يساعدها وسلطان يملك الكثير من المال…وبعد وقت كبير من التفكير اتصلت شجن على هاتف سلطان….الذي تهلل وجهه بالابتسامة عند سماع صوتها الرقيق الضعيف وهي تقول بتوتر وتلعثم واضحان على نبرتها:
“معلم سلطان…أنا شجن لو سمحت يا معلم أنا عايزاك في خدمة ”
“تحت امرك ياست البنات اتفضلي في انتظارك”
