لن استسلم الجزء الأول سارة سعد
*همهمت شجن بالموافقة بعد تفكير عميق ثم قالت متوترة :
“بس أنا خايفة مش عارفة حاسة نضال بيه ده نظراته فيها حاجة غريبة وكمان الست كريمة ديه مش طيقاني مش عارفه عملتلها إيه هي كمان”
*مررت أم سعيد أصابعها المجعدة بين خصلات شعر شجن الناعمة:
“لأ متخافيش يا بنتي توكلي على الله و متخافيش على أبوكي وعلي في عيوني خدي بالك بس من شغلك و إن شاء الله ترتاحي يا حبيبتي ”
*أومأت برأسها وهي تستسلم لأمرها الواقع…ورددت بخفوت:
“يارب يا خالتي”
***********************
*صرخت رتيبة ببكاء تضرب فوق ساقيها الممتلئتين بابنها عديم الشخصية:
“ياخيبتك السودة في عيالك يا رتيبة…. البت غضبانه و قاعدة جنبك والتاني موكوس الرجا ابني عايز يفضل مع الأرض البور إلا مش عارفة تخلف حتت عيل وكمان دايرة على حل شعرها”
*وضع مجدي الطعام في فمه بكثره يتجاهل عويل وصراخ أمه…لتقول أخته دلال بسخرية وهي تلوي شفتيها:
“سبيه نايم على ودانه مش حاسس بحاجة كل الحته بتكلم عليها وعلى خيبته……تقدر تقولي جابت فلوس عملية أخوها منين يا خويا ولا
ضربت الأرض طلعت بطيخ؟”
*وقف مجدي يقترب من أخته الجالسة بجوار أمه تطلق الإتهامات الباطلة على زوجته:
“خمس تلاالف جنيه… جابت المبلغ ده منين بنت***وكانت معايا أنا بس تشكيلي بالفقر
يتحرق أخوها على أبوها بس أنا تقولي لا!”
*هتفت أمه بغضب تلكمه بصدره:
“هو كل إلا همك الفلوس راحت فين ومهمكش جت منين….الحتة كلها بتقول أن بنت مصطفى وفايزة ماشية على حل شعرها…مشي باطل ده غير إلا بتعمله مع المعلم سلطان إلا يعرف ربنا شوف مراتك فين؟ وطلقها وريحنا من الغلب ده يا موكوس يا ابن الموكوسة”
*همهم مجدي بالكلمات المتذمرة الساخطة على أمه:
“بقولك إيه مهما تقولي مش هطلقها أبدا المعلم سلطان ساعدني كتر ألف خيره وزي بروح أمها ما جابت فلوس لأخوها تسد هي دين المعلم سلطان بتاع الكفالة… وهترجع ليا ياما زي الجزمة وساعتها هاعرف أربيها كويس وهكسر رجلها”
*لوت دلال شفتيها بسخرية ترمق مجدي بنظرات الإستهزاء :
“مش قولتلك ياما ابنك ده مفيش فايدة منه عشان الكيف بتاعه ودماغه العالية يستحمل على نفسه أي حاجة بس إحنا لا اتكلمي يا ماما هتخليها ترجع تعيش معانا في البيت تاني ولا إيه؟”
